Nongstoiñ, Naiwieng 12: Ka Hynniewtrep Youth Council (HYC)-Nongstoin Unit, kala leit ban ujor sha u Executive Engineer bad u Sub Divisional Officer ka MeECL Nongstoin Division halor ka jingpynieng ia artylli ki post elektrik ka Tnad ha syndah jong ka skul, kaba lah ban buh jingma ia ki khynnah skul.
Ka HYC-Nongstoin bala ialam da u President samla Wilson Myrthong kala iakynduh markhmat ia kine ki Ophisar ka Tnad MeECL bad kyrpang ba kin thaw lad thaw lynti ha kaban pynkynriah noh ia ki post elektrik na ka skul Mount Hermon English sha ki jaka ba kham pajih.
Haba iakren bad u nongthoh khubor, u samla Wilson ula iathuh ba kane ka jingleit ujor ka dei halor ka jingkyrpad jong ki nongpyniaid skul ka Mount Hermon bad ki Nongshongshnong ka kyntoit Mawbyrshem bad ki trai jong kawei ka Iing ha Them Iew ia ka seng ba kan khmih lem.
“Ka Seng ka sngewdei ban shimkhia ia kane bad mynta ka sngi ngi la iakynduh ia ki ophisar bad aiti ruh da ka jingthoh ba kin leh eiei ha ka ban pynkynriah noh ia kine ki post elektrik” ula ong.
Kat kum ka jingong jong u, kane ka jingiakynduh ka long kaba seisoh ha kaba kine ki Ophisar kila kular ba kin sa phah ia u nongtrei ban leit jurip ia kine ki post elektrik ha ryngkat bad ki nongialam ka seng.
U pyntip ba kila kular ruh ba hadien ka jingioh kaiphod na une u Nongtrei, kin sa phah ia ki nongtrei ba kin pynkynriah noh katba lah ia kitei ki post elektrik khnang ba ki khynnah skul bad ki nongshongshnong kin lait na ki jingma.
