Shillong Jylliew 11: Ki paidbah bad ki bahaiing bahasem hynne ka sngi Ba-ar, kila leit tep don burom ia u Bah Sounder Strong Cajee, uba long uwei na ki nongseng ia ka Federation of Khasi Jaintia and Garo People (FKJGP) bad u MDC barim ka Mylliem Constituency.
U Bah SS Cajee ula khlad noh ha ka rta kaba 58 snem bad ula iehnoh shdien iala ki 2 ngut ki khun bad u shong u sah ha Laban, Shillong.
Ki paidbah na kylleng ka jaka, kila wan ban leh burom khatduh ia une u nongialam paidbah ha kaba la sakhi ruh ba ki MLA, ki MDC, ki riewpawkhmat, ki nongialam na ki seng saiñ pyrthei kila wan ban sngewlem bad leh burom khatduh ia une u nongialam.
Ki nongialam barim bad kiba mynta jong ka FKJGP na rilum Khasi bad Garo, kila wan ban leh burom khatduh, ha kaba kila tap ia ka lama jong ka seng ha ka synduk jong une u nongialam.
Hashwa ban sdang ia ka jingiaseng hapoh ïing, la ioh shwa ia ka jingkren bad ka jingpynpaw ia ka jingsngewlem, ha kaba ki nongkren kila pynpaw iaka jingsngewsih iaka jingduh noh ia une u nongialam bad kila pyrto ruh ia ki kam kiba bha kiba une u nongialam ula leh bad noh synniang shi katdei sha ka imlang sahlang bad sha ka jylla hi baroh kawei.
Hadien kane, ki nongialam ka Balang Church of God Ecclesia kila shim ia ka bynta ban pyndep iaka jingleh niam bad hadien kane, la rah noh ia ka met jong u Bah Sounder Strong Cajee ban tep don burom ha u Lum jingtep ha Lummawnei, Mawlai Nongkwar.
