Shillong, Nailar 01 : Ki nongshong dukan madan kiba don hapoh ka lama ka Meghalaya and Greater Shillong Progressive Hawkers and Street Vendors Association (MGSPHSVA), ha ka sngi Thohdieng, kila leit iakhih da kaba shong kyllain mungor hakhmat ka Ophis ka Shillong Municipal Board (SMB) namar ka kam pynkynriah iaki dukan madan na Khyndailad.
Kine ki nongiakhih kila dawa ban pynlong noh mardor ia ka jingialang jong ka Provisional Town Vending Committee (PTVC) ban pynbeit ia ka kam ba iadei bad ka jingbym don ia ki Certificate of Vending (CoV) sha kiba bun ki nongshong dukan madan ba dei hok ban ioh ia ki syrnot ha ka thain Khyndailad.
Kane kala wan jia hadien ka jingpynkynriah ia ki nongshong dukan madan dang shen sha ka jaka pynieng kali ha MUDA complex.
Ka Kong Angela Rngad, nongialam ka Thma u Rangli-Juki (TUR) haba kren na ka bynta ka MGSPHSVA, kala maham ba ki nongshong dukan madan ki lah ban pynjur ia ka jingiakhih lada ym lah ban pynlong noh mar mar ia ka jingialang jong ka PTVC.
“Ngi dawa ba ka PTVC ka dei ban shong jingialang noh mar mar ban khmih ia kikam jong kito kiba shah pynduh ia ki CoV watla ki dei kiba don hok ban ioh shong dukan madan ha Khyndailad. Lada ym lah, yn pynbor ia ngi ban pynjur ia ki jingiakhih” kala ong haba iakren bad ki nongthoh khubor.
“Ki dang don bun ki nongshong dukan madan ki ba dang dei ban ai ia ki CoV. Kumno phi lah ban shu knieh noh ia ka kamai jong ngi da bun bun taiew?. Katno ka eh ia phi ban pynshisha ba ki dei ki nong shongdukan madan ba dei hok?. Namar kata, ka long kaba donkam ban khot iaka jingialang ka PTVC namar ia ka CoV ym lah satia ban shu ai da ka SMB. Lada ki khot ia ki briew shimet shimet, iathuh ia nga ba mano ban khang ia ki ban die ia ki CoV?. Ki lah ruh ban ai ia ka CoV sha ki briew ki bym dei hok. Namar kata, ngi ban jur ba kane ka kam ka dei ban iaid lyngba ka PTVC bad ba dei ruh ba buh bha ia kijingthoh namar ngim kwah ia kano kano ka bamsap ne ka jingleh shiliang ha kane ka kam” kala ong.
Kala pyntip ruh ba kane ka seng kala dawa ban shong pyrkhat biang ia ka vending zone bad ban pyn beit biang iaki jaka shong jong ki dukan madan kiba donkam tang khyndiat eh ki jaka ban die kwai ne um.
Ka kong Angela kala kynnoh ruh ba ka don ruh ka jingbamsap ha ka pisa bad ka bor ha ka jingtei ia ki dukan bad ki rynsan die jingdie jong ki nongshong dukan madan.
Ki nongshong dukan madan kila kut jingmut ban pynbteng ia ka jingiashong kyllain mungor tad haduh ba ka SMB kala mynjur ban khot ia ka jingialang jong ka PTVC.
, ha ka sngi Thohdieng, kila leit iakhih da kaba shong kyllain mungor hakhmat ka Ophis ka Shillong Municipal Board (SMB) namar ka kam pynkynriah iaki dukan madan na Khyndailad.){kind=link}