Shillong, Rymphang 02: Ka nongkhaii hehspah ka jylla ka Kong Banalari Khongwar kaba long ruh ka nongialam jong ka seng UDP hynne ka sngi Palei kala leit ban pyniasoh noh bad ka seng NPP ban ai jingkyrshan ia u Bah Prestone Tynsong uba iakhun iaka elekshon MLA na Pynursla Constituency.
U Bah Prestone Tynsong ryngkat bad ki nongialam ka NPP, kila pdiang sngewbha sha ka seng iaka kong Banalari ryngkat bad ki nongialam kiba hakhmat eh ki jong ka haka jingialang kaba la long ha ophis treikam jong ka NPP ha Shillong.
Ka Kong Banalari haba ai jingkren kala iathuh ba kala iakhun arsien iaka elekshon MLA ha u snem 2008 bad 2013 pyrshah ia u Bah Prestone hynrei ha u snem ba la dep kala mih noh na ka seng UDP ban pynleit jingmut noh ha ki kam shimet ki jong ka.
“Haba nga la mih noh na ka seng UDP, ki paralok, ki nongialam bad ki nongkyrshan ki jong nga kiba la kyntu ia nga ban pyniasoh noh bad ka NPP” ong ka Kong Banalari.
“Ha ka por ba u (L) Dr Donkupar Roy u dang long u President ka UDP, ngi ki nongtrei jong ka seng ha Pynursla, ngi ia ieid bad ia sngewtynnad haduh katta katta hynrei haba im shim la don shuh bad la wan noh da kiwei kiba thymmai ki nongkitkam jong ka seng kumta naka daw shimet nga la mih noh naka seng UDP mynshem snem” ong ka Kong Banalari.
Kala ong haba ka peit iaka jingtreikam u Bah Prestone ba ula leh bha iaka dong ka thaiñ ha baroh ki liang kumta kala noh mynsiem ryngkat bad ki paid nongkyrshan ban ia kyrshan noh ia u Bah Prestone ha kane ka kynti.
