Shillong, Iaiong 13 : U MLA barim Estamur Mominin ha ka sngi Nyngkong, ula leit ban pyndem ialade hakhmat ki Pulit ka Nongpoh Police Station hadien ka jingphetrieh haba iadei bad ka jingkulmar ba khie dang shen ha ri-lum Garo namar ka elekshon GHADC.
U Mominin ula phetrieh naduh ba khie ka jingkulmar bad ka jingiakynad pher Jaidbynriew hadien ba mih ka jingpyrshah ia ka jingioh iashimbynta ki bar jylla ha ka elekshon GHADC.
Kat kum ka khubor Pulit, kane ka kynrum kynram ka dei kaba jia naduh ka 9 tarik Lber, haba u Mominin ula poi ha Ophis u Deputy Commissioner ha Tura, ban thep kyrteng kum u kyrtong na ka bynta ka elekshon GHADC. Kane ka jingleit jong u, kala pynkhynwin ha phyllaw ka Ophis u DC, kaba la lam pat sha ka jingkulmar.
Ha kane ka juh ka sngi, la kynnoh ba u Mominin ula ai ia ka jingkren pynshit Jaidbynriew ha Chibinang, kaba la nang pynheh ia ka jingkulmar bad lam sha ka jingkulmar kaba nang pur ha kylleng ki jaka ka ri-lum Garo.
Hadien kine ki jingjia, ka jinglong jingnam kala nang sniew shuh shuh, kaba la pynbor ia ka Sorkar ban pynsangeh shuwa ia ka elekshon GHADC.
Ka khubor Pulit ka pynthikna ba u Mominin ula phetrieh ban lait na ka jingshah kem naduh katei hi ka por ba mih ki jingkulmar ha ri-lum Garo.
Kat haduh mynta ym pat lah satia ban tip ia ki jingkynnoh pyrshah ia u bad ki sienjam ba ki pulit kin leh kat kum ka lynti jong ka ain.
