Umroi, Rymphang 25 : U MP ka Lok Sabha na Shillong Bah Vincent H Pala, ula leit ban peitkai ia ka lympung ialehkai phutbol miet jong ka Tbeh Jingshai Umroi Football Association (TJUMFA) hynnin ka sngi Saitjain, kaba la nang iaid shaid shaid mynta ha madan Umroi.
Une u MP ula poi peitkai ia ka jingialehkai hapdeng ka Baby Football Club pyrshah iaka Eastern Football Club, ha kaba ka Baby FC kala lah ban pynliem ia ka Eastern FC da 2-1 kol.
Ka jingleit peitkai jong une u MP ia ka lympung ialehkai ka long kum ka jingleit ai mynsiem ia ki nongpyniaid ia ka lympung bad ruh ia ki kynhun kiba wan iashimbynta. La synran ia u da ki MLA ka Congress ba kynthup ia u Bah Charles Marngar, Bah Gabriel Wahlang bad ki Rangbah Shnong ka Umdohbyrthih Bah PB Sylliang, Rangbah Shnong ka Nongrah Bah P Dkhar bad kiwei kiwei.
Haba kren ha kane ka janmiet, u Ma Vincent H Pala, u la ai ka jingiaroh ia ka TBUFA kaba lah ban pynlong ia ka lympung ialehkai football ha ka por mynmiet kaba long shibynta ban ai rynsan ia ki rang ialehkai football kiba donsap bad ban khring ia ki samla ban ialehkai ne kilan met ha ka por mynmiet ha ka jaka ban mlien ban leh ia ki kam sniew ne ban ia dih ia ki jing dih buaid.
“Ka dei ka sien kaba nyngkong ia nga ban sakhi ia ka jingialehkai football ha ka por mynmiet ha kane ka jylla bad ka long shisha kaba itynnad bad kaba shitrhem ban sakhi ba ki samla ki hiar madan ban aireng ha kane ka lympung ialehkai miet kaba nyngkong eh ruh hapoh ka them Ri Bhoi District”, ong u Ma Pala da kaba kitbok ruh ia ki kynhun ialehkai ban trei shitom bad ban iakhun tyngeh ban ioh rah ia ka nam kum ka kynhun lahduh.
Ha kane ka janmiet, u Ma Vincent H Pala u la noh synniang da ka song pisa sha ka kynhun jong ka TJUMFA kum shibynta ban ai mynsiem bad ban kyrshan ia kane ka kynhun ban lah ban pynlong ia kane ka lympung ialehkai football kaba jop.
