Shillong K’lyngkot 08: U MDC ka Nongkrem Constituency Bah Lambor Malngiang hynne ka sngi Balang ula leit iakynduh ia u Chief Executive Member (CEM) ka KHADC Bah Pyniaid Sing Syiem ban pan jingpynshai halor ka jingpynmih thymmai ia ka shnong Mawsaw kaba don ha Lad Smit.
“Nga lah kren da kaba shai ia ki paralok ba ngan iaid shakhmat ha kaban ia pynbeit ia kane ka kam namar mynta kala kynthup ia ki saw tylli ki mamla, kala iatakhuh hapdeng ki artylli ki shnong Umphyrnai bad Ur Masi U Joh), ka Hima bad ka District Council” ong u Bah Lambor haba iakren bad ki nongthoh khubor.
“Nga lah ai da ka jingthoh ban ioh ia ka jingpynshai halor ka jingwanrah ia ka shnong bad kaba paw ha ka kyrteng kaba la soi kadei ka kyrteng jong u Deputy CEM u Bah PN Syiem. Ngam pat ju iohi ban pynmih ia ka hokum namar bunsien ia ki hokum la pynmih da ki Joint Secretary ka Elaka ne ki nongtreikam ha katei ka tnad, hynrei kaba phylla ka long ba ia ka jingmynjur bad ia ka hukum kala paw da ka kyrteng jong u Bah PN Syiem” la ong u Bah Lambor.
Ula iathuh ba ha ka jingwad jingtip, na ka liang jong u Syiem ka Hima Khyrim u Dr Balajied Sing Syiem ym shim la ai ia kano kano ka jingbthah na ka bynta ban wanrah ia ka shnong kaba thymmai, hynrei kala shu iaid noh kumto ban pynsted ban wanrah ia ka shnong kaba thymmai.
“Ngi kwah ban pynbeit noh ia kane ka kynrum kynram ban wanrah biang ia ka jingsngewthuh hapoh ka shnong Umphyrnai bad Ur Masi U Joh. Ngan ap namar kila pan por ban ioh ban pynbeit, hynrei ngan sa ai biang sa kawei ka jingthoh, la ka long ba nga hap ban iaid ryngkat bad ki nongiasaid ain ban iaid shakhmat na ka bynta kumno ban pynbeit ia kane ka kynrum kynram kaba mih hapoh ka thain ka jong nga” la ong u MDC ka Nongkrem.
Ula ong ba ka ju don ka jingphiah ia ki shnong ki thaw haba kala heh palat ka shnong hynrei udei ban don pat u pud ban ioh ia ka jingmynjur na ka shnong kmie shwa ban pynmih ne pynkha ia ki shnong khun bad kane kadei ka rukom peit rukom khmih bad katkum ka Section 3 jongka Elaka Act ka kren shai ba hap ban ioh shwa ia ka jingithuh ne jingmynjur na ka shnong kmie.
“Kum u Nongialam ki paidbah bad u MDC kadei ka kamram ka jong nga ban pynthikna ba kiei kiei kidei ban iaid beit iaid ryntih” la ong u Bah Lambor bad ka bynrap “Ngam don ka jingpyrshah iano iano ruh hynrei lada ka don ka jingiabeit kam don eiei hynrei ban shu sngap kam long kum u nongialam hynrei nga hap ban mih shakhmat namar ki paidbah kin hap ban phai khmat sha u nongialam kumta nga hap ban pyni ia ka nuksa kaba bha bad ban pynthikna ba kiei kiei baroh dei ban leh da ka jingbha”.
