Shillong, Jylliew 28: Ka seng Hynniewtrep Youth Council (HYC) hynne ka sngi kala pynlong iaka jingiakhih hakhmat ka State Convention Centre ban dawa wengkam noh mardor ia u Puranjan Das uba la shah thungkam biang kum u Chief General Manager jong ka tnat Meghalaya Tourism Development Corporation (MTDC) wat hadien ba ula shongthait haka 31 tarik Lber 2023.
Haba kren sha ki lad pathai khubor u General Secretary ka HYC Roykupar Synrem ula iathuh ba haka 24 tarik Jymmang, ka HYC kala thoh sha ka MTDC ban pynsngew iaka jingpyrshah halor ka jingthungkam kontrak biang ia u Puranjan kum u Chief General Manager jong ka MTDC.
“U Puranjan Das ula dep ban shongthait naka kam haka 31 tarik Lber hynrei hakane ka juh ka sngi u Managing Director ka MTDC ula pynmih daka hukum bala thungkam kontrak biang ia u kum u Chief General Manager naka bynta 6 bnai” la ong u bah Roykupar.
U bah Roykupar ula kynnoh ba kane ka jingthungkam kontrak biang ia u Puranjan ka long kum ka mawjynthut iaki khun samla ka jylla ban thep kam ha kane ka tnat bad ka long ruh kum u maw jynthut iaki para nongtrei khamtam kito kiba dei ban ioh kiew kyrdan.
“Mynta ka sngi, ka seng kala ioh jingtip ba ka don ka jingialang jong ka Board of Directors jong ka MTDC bad dei namar kane ka seng kala wan ha ryngkat ki pla card ban pynpaw iaka jingpyrshah ban thungkam kontrak biang ia kino kino kiba la shongthait nala ki kam ba ki trei” ong u bah Roykupar.
U bah Roykupar ula iathuh ba hashuwa ka jingialang, ka seng kala ioh ban kynduh ia u Chairman ka MTDC bah Sanbor Shullai haka jingdonlang u MDC ban pan ka jingpynshai na ki heh kane ka Corporation.
“Haka jingialang ki heh ka MTDC kila pyntip ba ki khlem pynjlan iaka snem treikam u Puranjan Das hynrei kila shah ia u ban bteng biang sa 6 bnai iaka kam ba u trei namar ka MTDC kam lah ban khot Application thepkam thymmai namar ka don ka Model Code of Conduct ba don ilekshon bad kadei ruh ka kut snem mang tyngka” ula ong.
Haba kylli kaei ka sienjam baka MTDC kan shim halor kane ka jingdawa ka seng, u bah Roykupar ula ong “Ki heh ka MTDC kila kular ba hadien ba kut ka samoi trei jong u Puranjan Das kata ha u bnai Nailar, ka MTDC kan khot khot Application thymmai naka bynta ban thepkam naka bynta ka kam chief general manager”
