Shillong, K’Lyngkot 04: Ka Miss Tourism India ba mynta, ka samla Irene Dkhar na Meghalaya, ka la pynkhreh ban mihkhmat ia ka Ri India sha ka lympung Miss Tourism World 2025 Global Finals, ka ban long ha ka 10 tarik Kyllalyngkot ha Guangdong, China.
Ka samla Irene ka la mih na Nongbah New Delhi ha ka 27 tarik u Nohprah 2024 ban ïadon bynta lang bad ki nongïakop na palat 60 tylli ki ri kynthup ïa ka America, France, Brazil, Venezuela, bad ki dkhot jong ka Belt and Road Initiative bad ka Shanghai Cooperation Organisation.
Ia kane ka jingiakop Miss Tourism World la ithuh namar ka jinglah ban kyntiew ia ka kam jngohkai pyrthei bad ka kolshor jong baroh ki ri kata ka ri ba pynlong iaka rynsan bad ki ri kiba iashim bynta.
Ha ka jingïalang bad ki nongthoh khubor ba la pynlong ha Guangzhou ha ka 3 tarik mynta u bnai, ki riew pawkhmat kum u Ahmed Mustafa Fahmi, u nongmihkhmat jong ka Arab League sha China, ka Sinisha Belyan, ka Ambassador jong ka Bosnia bad Herzegovina sha China bad u Ivan Chiulu Ambassador ka Zambia ha China, kila pynpaw ka jingkyrshan ia kane ka jingiakop ia ka ba la kyrshan daka Sorkar China.
Ka jingleit shim bynta ka samla Irene Dkhar sha ka rynsan iakop thei bhabriew kala long kaba jop namar kala rah ruh ïa ka nam lahduh jong ka Miss Tourism India 2024 ha Jaipur, Rajasthan, ka la ïoh bun ki khusnam, kynthup ïa ka Miss Meghalaya 2022, Miss Northeast 2022, Femina Miss India Meghalaya 2023, bad Miss Grand India Meghalaya 2024.
