Shillong, Risaw 04: Arngut ki nongshna phlim kiba don sap, katta ka kong Simi Khongtiang na Jaiñtia Hills bad ka Elvachisa Sangma na Tura West Garo Hills, ki la shah jied ha ka Sorkar Jylla ban mihkhmat ïa ka Meghalaya sha ka Busan International Film Festival, 2024.
Kane ka tamasa pyni phlim kala sdang naduh ka 2 tarik haduh ka 11 tarik Risaw ha nongbah Busan jong ka Ri South Korea.
Ka kong Simi Khongtiang ka dei ka nongshna phlim kaba dang sdang paw pyrthei khamtam ha Meghalaya ia kaba la ithuh na ka bynta ki jingnoh synniang jong ka sha ka jingshna Film.
Katba ka Elvachisa Sangma ka dei ka nongshna phlim kaba la ioh khusnam bad kaba la ioh ia ka jingithuh ha ki rynsan pyni Film ba pawnam kum ka Mumbai International Film Festival (MIFF).
Ka tnat Information and Broadcasting, ka Sorkar India ka la ai jingbthah iaki Jylla ka thain shatei lammihngi (North East) ban jied ia 2 ngut ki nongmihkhmat ba kynthup iwei nongshna phlim samla bad iwei nongioh khusnam na ki tamasa phlim ba pawnam kum ka National Film Awards (NFA), ka International Film Festival of India (IFFI) lane ka Mumbai International Film Festival (MIFF) ban leit sha katei ka tamasa pyni Film ha South Korea.
Ka tnat Directorate of Information and Public Relations (DIPR) Meghalaya ka la jied ïa ka Kong Simi Khongtiang bad ka Elvachisa Sangma ban mihkhmat ïa ka Jylla.
Kum ka jingkyrshan ia kane ka kynhun, ka National Film Development Corporation (NFDC) kan bei lut ia baroh ki jinglut jingsep, kynthup ia ka bai liengsuin bad ka bai sah na ka bynta san sngi ha kane ka tamasa, khlem da khein ia ki sngi leit jingleit.
Ka Fraternity Art Cine Entertainment Shillong, ka ai khublei ïa ka jingtrei shitom jong ka Directorate of Information and Public Relations (DIPR) Meghalaya ban kyntiew ïa ki nongshna phlim ka Jylla daka ba ïarap ïa ki ban ïoh ïa ka jingithuh ha ka pyrthei.
Ka Fraternity Art Cine Entertainment ka la ong ba ka jingïashim bynta ha ka Busan International Film Festival kan ai ka lad kaba kyrpang ïa kine ki nongshna phlim ban pyni ïa ka sap ka phong jong ki ha ka rynsan jong ka pyrthei, kaban pynroi ïa ka jingiasam mar kylliang bad jingïatreilang iaki jingtip haki rukom shna film.
.){kind=link}