Guwahati, Risaw 14 : Hashuwa ban wan ka Durga Puja, ka Guwahati High Court kala bthah ia ka Sorkar Jylla ban hukum ia baroh ki District Commissioner (DC) bad Superintendent of Police (SP) ba kim dei ban aijingbit ia kino kino ki riewshimet ne ki seng ba kin pyniaid ia ki lottery online ne offline ha ka Jylla.
Ka Division Bench u Chief Justice Vijay Bishnoi bad Justice N Unni Krishnam Nair, ula ong ba lada shem ia ka jingpynlong beain ia ki lottery beain la ka dei ka online ne offiline, ki SP bad ki bor District ki dei ban leh eiei mardor pyrshah ia kito ki briew ne ki nongpyniaid ba donkti, kat kum ki kyndon ka Ain.
Ka Bench ha ka sngi Palei kala pynmih ia kane ka hukum haba shong bishar ia ka mukotduma bala mudui da u Rupam Borborah, uba la kynnoh ba ki don bun ki lottery online bad offline ha kylleng ki District, kiba pyniaid beain bad ba pynkhein ia ka Lotteries (Regulation) Act, 1998 bad ka Lottery Regulation Rules, 2010 bad ba ka Sorkar Jylla kam shym la leh eiei ban tehlakam ia ki.
Ia kane ka mukotduma la mudui ha ba sdang jong une u snem.
