Shillong, Nailar 07 : U MLA ka BJP u Bah Sanbor Shullai ula leit iakybduh ia u Lat ka jylla u CH Vijayshankar ban pyntip halor ka jinglong jingman ha ki thain̈ khappud ka jylla Meghalaya bad ka ri Bangladesh.
U Bah Sanbor Shullai hadien ka jingwan iakynduh ia ki nongshong shnong ka Pyrdiwah bad thain Dawki, ula leit beit beit sha iing u Lat ban ai ia ki jingtip halor ka jinglong jingman ha ka thain khappud.
“Nga la wan beit beit na khappud ban leit ai ia ka kaiphod sha u Lat ka jylla ba haduh mynta ki paidbah ki shongsuk shongsaiñ hynrei ym lah pat ban tip ia kaei kaban jia pat lashai lashi sngi. Kala don ka jingpynbeit ruh na ka liang u Lat ka jylla kum u nongkit tien syiem ka ri un shimkhia ban iakren” ong u Bah Sanbor hadien ka jingwan iakynduh ia u Lat ka jylla.
Ula ong, ba ka Sorkar Jylla bad na ka liang ka sorkar ha Delhi ruh, naduh ki BSF haduh ki shipai kila long kiba la pynkhreh ban iakhun pyrshah ia ki briew kiba leh klumar.
U Bah Sanbor ula ong, “Na ka liang u Lat ka jylla ula ai ka jingpynthikna ba mynta hi wut wut yn lum ia ka jingialang bad ki heh ophisar ba kin rah ia ka khubor ba kin pynkhreh ia ka jingpahara ioh don kano kano ka jingwan tur jubor ne rung beain ki briew sha Meghalaya. Ngi lah iakren ba ngi ruh ngi dei ban pyndonkam da ka bor kat kum ki ain ki kanun bad lada donkam ban hiar da ka thma ne ban siat ia ki ruh”
