Nongpoh, Naitung 15: Ka Synjuk Ki Rangbah Shnong Ribhoi District hynne ka sngi Nyngkong, kala iakynduh ia u Deputy Commissioner ka Ri-Bhoi Abhilash Baranwal ban iasyllok bad ai ka jingiatreilang ha ka ban lah pynneh pynsah ia ka shongsuk shongsain hapoh ka District.
Kane ka jingleit iakynduh ka dei ruh ka sien ba nyngkong hadien ba wan shimti thymmai u Baranwal kum u Deputy Commissioner ka District.
Haba kren sha ki lad pathai khubor, u Chairman ka Synjuk Bah BB Makdoh ula ong “Ngi la iohi ia ki jingshah kynthoh ha ki ba bun ki liang jong u DC barim jong ngi, kumta ka Synjuk kam kwah ba une u DC ba thymmai un shah kynthoh lang kumjuh. Ngi kwah ba une u DC un ai ka jingiatreilang ryngkat bad ki Dorbar Shnong lem bad ki paidbah ka thain Ri-Bhoi”.
U Bah Makdoh ula pyntip ba ka jingiakren kala iaid ruh halor ka jingjyllei jong ki nongdih droks ha kylleng ki jaka jong ka District.
“Ka jingjyllei jong ki nongdih droks kala pynkiew ruh ia ki kam sniew naduh ki kam tuh kam thiem bad kiwei kiwei ki kam runar ha ki shnong ki thaw. Ngi donkam ban don ka jingiatreilang bad ki bor pyniaid District lem bad ki bor Pulit ban the lakam ia kine ki kam bymman” ula ong.
Haba kynthoh halor ka jingbeh ka lyer ban dawa pyntreikam ia ka ILP bad MRSSA ha Jylla, u Bah Makdoh ula ong “Ka Ri-Bhoi District, ka dei ka jingkhang bah jong ka Jylla Meghalaya. Ki bar jylla kiba bun ki rung ki mih na Ri-Bhoi…kumta lada kam don ka jingiatreilang ki Rangbah Shnong, ka long kaba eh ban tehlakam”.
U Bah Makdoh ula ong ruh ba dei tang ki Rangbah Shnong bad ki Nongshongshnong kiba lah ban ithuh ia ki bar jylla kiba wan rung wan mih hapoh ki shnong ki thaw.
