Tura, Naitung 23: Ki pulit ki la hiar khynra kynsan ia ka farm house jong u MDC BJP ka Tura, u Bernard Marak kaba don ha Edenbari kaba don pajih na Tura ha kane ka sngi Thohdieng janmiet.
Ki pulit ki la iathuh ba katei ka jingkhynra ka la sdang naduh ka por 6.30 ei ei janmiet bad ka neh kumba hynniew namar ka jingkhynra kala bteng tad haduh 2:00 baje mynstep.
Ha katei ka jingkhynra, ki la don haduh kumba 60 ngut ki briew kiba dang ia leh kmen ha katei ka jaka ba ju tip kum ka RB ki la shah kem. La ong ruh ba la lap ia ki lai jur kiba dang ia leh ia ki kam bym itynnad ha ki kamra bapher bapher kiba don ha katei ka RB.
Nalorkata, la iathuh ruh ba ki pulit ki la ioh ban kurup palat 1000 litar ka kyiad beain.
Nalorkata, la ong ruh ba na kawei ka kamra kaba don ha katei ka RB, la kam ba la lap ruh ia kawei ka samla kynthei bad i khunlung ba dang rit kiba don ha ka jaka kaba jaboh. Ia kine baroh la iati sha ka tnad Social Welfare.
Ha katei ka jingkhynra, na ka liang u Deputy Commssioner ka West Garo Hills, u Swapnil Tembe ruh u la donlang.
La kam ruh ba ki la don bun bha ki jingujor pyrshah ia katei ka RB namar ka jingpynlong ia ki jaka ia dih ia bam beain bad ki kam jaboh.
Ha u 2019, bun tylli ki seng kynthup naduh ka FKJGP, AYWO, ADE bad GSU ki la dawa ban thung da ka jingtohkit halor ka jingpyniaid beain ia katei ka jaka ha Allotgre da u nongialamba rim ANVC, u Bernard Rimpu N Marak.
