Nongpoh, Nailur 24 : Ka Ri-Bhoi People’s Council (RBPC) ha ka sngi Palei, kala leit ban pynsangeh ia ka eksamin thungkam Staff Nurse ha MCH Hospital, Umsning Parila hadien ka jingioh jingtip ba bun ki nongthep aplikeshon ki dei kiba nabar ka District.
Kane ka eksam thungkam ka dei kaba la pynlong da ka Tnad ka Koit ka Khiah ka Jylla hapoh ka Morning Star Secondary School, Nongpoh.
Kane ka Seng hapoh ka jingialam u President Jason Lenox Nongrum, kala leit ban iakynduh shuwa ia ka DMHO ka Ri-Bhoi ban pynpaw ia ka jingpyrshah hashuwa ba kan leit pynsangeh ia kane ka eksamin.
Haba kren sha ki lad pathai khubor, U Bah Jason u la iathuh ba ka jingkhot ia katei ka eksam thungka lyngba ki advertisement kaba la mih haka 10 tarik Nailur, 2026, ka pynpaw ba ka khot lut ïa baroh ki khun samla ym tang napoh ka District ne ka jylla hynrei ka khot lut iaki samla wad kam na kylleng ka Ri.
U Bah Jason u la iathuh ruh ba ha kane ka jingwan thoh iaka exam, ki don kumba 192 ngut ki samla na Ri-Bhoi, katba kumba 231 ngut ki samla ki dei na shabar ka distrik kiba la thmu ban thoh ïa kane ka eksamin naka bynta 20 tylli ki post staff nurse.
Ula ong ba ka seng kam pyrshah ïa ki nongwad kam na shabar ban aplai ïa ki kam, hynrei, u la pynpaw ba ka seng ka dawa ba ki bor pyniaid ki dei ban ailad shwa ïa ki samla pule bad ki nongwad kam kiba dei na Ri-Bhoi, lada ki long kiba la biang bad kiba tip ban trei iaka kam.
U Bah Jason u iathuh ba ka RBPC ka la ju rah bunsien ïa kane ka mat sha ki bor district ban dawa ba dei ban ailad shwa iaki samla ka district ban trei iaki kam kiba dei hapoh ka District, khamtam namar ka jingduna ki samla ban ioh iaki kam ki jam.
Ka RBPC ka dawa ba ki bor ba dei peit kin shimkhia ïa ka jingdonkam jong ki samla ka distrik bad ban peit bniah ïa ka rukom thungkam, khnang ba ki nongwad kam kiba na Ribhoi kiba la biang ki jingpule bad kiba la tip ïaka kam ba kin ïoh ïa ka lad kaba biang.
