Shillong, Lber 13 : U Thomas A Sangma hadien ba ula shah jied kum u Lmaphang ba thymmai ka jylla, hynne ka lah sngi u Blei, ula leit ban jurip iaka jingtei iaka iingdorbar thawaiñ ka jylla kaba don ha Mawdiangdiang, New Shillong Township.
“Ka jingpyntrei ia ka kam ka long kaba biang, lait noh tang iaka bynta jong ka jaka kaba ka Dome kala khyllem noh” ong u Lamphang ha ka jingleit jurip ha ka sien kaba nyngkong eh ia ka jingtei iaka Assembly.
Ula iathuh ba kumba 80% na ki jingtrei la dep ban shna pyndep hynrei ka jingpyntrei iaki kam haka Main Chamber kam pat sdang satia hynrei ia ki jingtei ha ki bynta kiba don ha ka Liang Kamon bad Kadiang la jan dep lut ban shna.
“Ngin ym lah ban ioh iaka ïindorbar khlem da dei tei iaka Main Chamber, ka (Design) jingpynwandur kaba thymmai ia ka Dome dei ban khmih bniah bha bad ban ioh iaka jingmynjur naka IIT-Roorkee bad IIT Guwahati”, la iathuh u Lamphang.
U Lamphang ula ong, ba ula dep bthah ia ki tnad kiba dei khmih ba kin pynsted noh ia ki kam ki jam ha kaban aiingmynjur iaka Design kaba thymmai namar khlem da ioh jingmynjur ia katei ka jingpynwandur thymmai yn ym lah ban sdang ia ki kam ki jam bad ula ong ba hap ban thung biang iaka High Power Committee (HPC) bad mynta ki dang iaid shakhmat ban thaw iaka HPC kabathymmai.
“Nga la bthah ruh ba hapoh ka 15 tarik u Iaiong dei ban pynkhuid noh ia ki tiar ki tar bad ki maw kiba la hap naka jingkhyllem jong ka Dome bad ki kam ki jam kin ym lah ba nsdang khlem da ioh jingmynjur iaka Design kaba thymmai” ong u Lamphang.
Haba kylli la yn thung ia kano kano ka kynhun tohkit, khamtam haba kala don ka jingkynnoh ba kala don ka jingbamsap haka jingtei iaka Assembly kaba thymmai, na ka liang u Lamphang ula ong, “Ngam don jingtip eiei shaphang kita ki jingkynnoh bamsap, hynrei lada ki don eiei kum kita, nga pynthikna ba ka ophis jong nga kan long kaba khuid ba suba halor kane ka mat bad ngin pyrshang katba lah ban yn ym don kum kitei ki jingkynnoh bad ngin ialeh ban long beit kiba ai iaka jingkhein jingdiah kaba khuid ba suba”.
Halor ka jingkylli la yn aiti ha kajuh ka kompani ban pyntrei iaki kam watla kala duh iaka jingshaniah na ka jingkhyllem ka Dome jong ka Assembly, u Lamphang ula ong, “Ym pat lah ban ong eiei, namar haba aiti ia kano kano ka kam sha ka kompani kin hap ban pyndep ia ka jingiasoi iaka jingiatehkular, kumta ngam lah ban shu ong beit noh, ban weng noh iaki kontraktor ne ia ka kynhun kaba pyntrei ia ka kam. Ngi hap ban pynthikna ba kidei banbud ryntih iaka jingiatehkular kumba la aiti ia ka kam bad hap ban bishar bniah shwa ia ki namar yn ym lah ba nshu weng beit noh ia ki kumto”.
U Lamphang ula ong, bay m don jingtip eiei shaphang kata ka kaiphod jingtohkit ha kaba iadei bad ka jingkhyllem ka Dome jong ka Assembly.
“Ngam pat iohi iaka kaiphod ha kaba iadei bad ka jingkhyllem jong ka Dome bad kiei ki sienjam kiba la dep ban shim, hynrei haba phi lah pyntip ia nga, kumta ngan sa shimkhia ba dei ban pynshitom haka lynti kaba dei”.
