Guwahati, Risaw 14: Ka President Droupadi Murmu hynne ka sngi Thohdieng kala pynlong ka jingleit jurip ia ka jaka lehniam ba pawkhmat ka Kamakhya Temple kaba don halor jong u lum Nilachal Hills ha ka nongbah Guwahati ka Assam.
Ka president kala pynlong ruh ka jingduwai hapoh Kamakhya Temple ha ka sngi kaba khatduh ka jingwan jngoh ba arsngi ia ka jylla Assam.
Ia ka President Murmu la synran lang da u Lat ka Assam u Jagdish Mukhi bad u Myntri Rangbah (CM) u Himanta Biswa Sarma.
Kane ka dei ruh ka sien wan jngoh kaba nyngkong eh jong ka Droupadi Murmu ia ka Assam kum ka president.
Ha ka jingleit jurip kaba ar sngi kynthih ha Assam, ka president kala iashim bynta ruh ha kiba bun tylli ki prokram nalor ka jingplie ia ki projek bapher bapher.
Hynnin ka sngi Palei ka President Droupadi Murmu lyngba ka kor internet kala buh mawnongrim na ka bynta ki projek bapher bapher napoh Indian Institute of Technology (IIT), Guwahati.
Kine ki kynthup ha kaba iadei bad ka jingplie ia ka supercomputer facility, ‘Param Kamrupa’, kaba hap hapoh ka National Supercomputing Mission, bad ka laboratory kaba iadei na ka bynta ka design and development of high-power microwave components hapoh IIT Guwahati.
Shuh shuh ka Murmu lyngba ka kor internet kala plie ruh ia ka Dhubri Medical College and Hospital ha Assam bad buh ruh ia u mawnongrim na ka bynta ka zonal institutes of the National Institute of Virology ha Dibrugarh bad Jabalpur, Madhya Pradesh.
