Shillong Naitung 26: U Myntri ka tnad Bording u Abu Taher Mondal hynne ka sngi Thohdieng, ula leit jurip biang ban khmih ia ka jingiaid ki kam hapoh ka Dam Rehabilitation & Improvement Projects (DRIP) ha jingkieng Umiam.
Shuwa ban leit jurip, u Myntri Sorkar ula lum ia ka jingialang ban iakren ia ka jingiaid shaphrang jong ka kam ha kaba iadei bad katei ka jingkieng.
Ha kane ka jingialang la iadonlang u Sanjay Goyal, IAS, Commissioner & Secretary jong ka tnad bording bad u Chairman-cum-Managing Director ka Meghalaya Energy Corporation Limited (MeECL), u Director Generation MePGCL u Shri Bloomingstar Wahlang bad kiwei kiwei ki heh ophisar ka MeECL bad ki ophisar ka ITD Cementation.
U Myntri ula pynpaw ia ka jingkyrmen ba ia kane ka jingkieng yn plie pura noh ha kaba kut jong une u bnai bad ula bynrap ba ka High Power Committee kan sa shong jingialang ha ka sngi Nyngkong ban pynbeit ia ka tarik ban plie. Ha katei ka jingialang yn sa donlang u Consultant na IIT Guwahati, ka Director General of Police, ki heh ophisar ka PWD bad ki bor pyniaid district jongka East Khasi Hills bad Ri Bhoi.
U Myntri ula ban jur ia ka jingdonkam ban pyndep kloi ia ki kam kiba dang sah khnang ban pynthikna ia ka jingshngain bad ka jinglong slem jong ka Dam.
Kumban shu pynkynmaw, ba ki kam kiba la pyntrei hapoh jongka Dam Rehabilitation & Improvement Projects (DRIP Phase II & III) kiba la sdang naduh ka 14 tarik u Nohprah 2023.
Ka jingthmu ba kongsan jong ka DRIP ka long ban pynbha bad pynskhem shuh shuh ia ki Dam bad ki kam ba kongsan hapoh ka DRIP ki kynthup ia ka Drilling and Grouting, Crack Repairing bad ki kam kiba iadei bad ka Hydro mechanical.
 ha jingkieng Umiam.){kind=link}