Nongpoh, Rymphang 11 : U Myntri kam jngohkai ka Jylla Bah Paul Lyngdoh, ha ka sngi Saitjain, ula leit ban jngoh dalade ia ka jaka lehniam jong ka Raid Nongpoh ha u Lum Wortoh, kaba dei ruh kawei na ki jaka jngohkai ne view point ba lah ban iohi kyndiang ia ka sor Nongpoh bad wat ia ka sor Shillong.
Ia u Myntri la synran lang da u MLA ka Nongpoh Bah Mayralborn Syiem, Director ka tnad jngohkai Bah Cyril Diengdoh bad ki Ophisar na Ri-Bhoi District.
Haba kren sha ki nongthoh khubor, u Bah Paul ula pynpaw ia ka jingsngewhun ban sakhi hi dalade ia ka jinglong jingman jong u ne u Lum Wortoh u ba ka Dorbar Raid Nongpoh ka don ia ka jingthmu ban pynlong kum kawei ka jaka jngohkai pyrthei kaba paw bad ruh kum ka heritage site ka sor Nongpoh.
U la pynpaw ruh, ba kane ka jaka ka dei hok ban ioh ia ka jingithuh na ka sorkar jylla khamtam na ka tnad Tourism ha kaba shen, kan sa sdang ban leh ia ki survey bad kiwei kiwei ki jingdonkam na ka bynta ban kyntiew ia kane ka jaka kumba don jingthmu ka Raid Nongpoh.
Ula ong ba lyngba ka Tourism Policy 2023, ka sorkar jylla ka dep ban wad bniah ha ka ban iatreilang bad kiwei kiwei ki tnat treikam sorkar kiba ia dei bad ka jingkyntiew ia ki jaka jngohkai pyrthei.
Na ka liang u Bah Linus Lyngdoh, Lyngdoh Raid ka Raid Nongpoh, u la pynpaw ia ka jingkmen kaba khraw halor ka jingshimkhia da u MLA ka Nongpoh ban wan ialam ia u Myntri ka tnad Tourism ban ioh sakhi ia ka jingitynnad jong kane ka jaka jngohkai pyrthei halor u lum Wortoh. Ula pynpaw ruh ia ka jingkmen halor ka jingkular u MLA ban pynioh noh ia u surok ban pynsuk ha kaban poi sha u ne u Lum.
“U ne u lum u don ruh ia ka khana ka pateng kaba bun ha kaba ki kmie ki kpa tymmen mynshwa ki shong ki sah halor u ne u lum bad hadien ka jingnang roi ki la hiar shapoh u ne u Lum ha kaba la mih ka kyrteng Nongpoh bad kiwei kiwei ki khana ki pateng”, pynpaw u Bah Lyngdoh da kaba bynrap ruh, ba ki da angnud ba ka sorkar jylla lyngba ka tnad Tourism kan theh ia ki lad jingiarap ban kyntiew ia kane ka jaka kum kawei na ki jaka jngohkai pyrthei ba paw hapoh Ri Bhoi District.
