Shillong, Naiwiwng 19 : U Symbud Myntri Rangbah ba khmih ia ka Tnad Transport Bah Sniawbhalang Dhar, ha ka sngi Balang, ula leit jngoh ia ki arngut ki samla pule ka NEHU ba shah sumar ha ICU ha Nazareth Hospital hadien ka jingshah tynrah ha ka kali ba pynher sted bha hapoh phyllaw ka skulbah.
Ula pynbna ruh ia ka rai jong ka Sorkar ban siew lut ia baroh ka bai lut bai sep ha ka jingsumar ia kine ki samla pule-ka samla Daritngen Pohdukhei bad Stephanie Shadap.
“Ka dei ka jingjia kaba ishyrkhei bad ba ima bha” ong u Bah Dhar haba iakren bad ki nongthoh khubor.
“Ki bahaiing hasem kila pyntip ia ka Sorkar bad ka dei ka kamram jong ka Sorkar ban khmih ia kane ka kam, khamtam ba ki dei ki samla jong ngi” ula ong haba bynrap “Ka jinglong jingman jong kawei na kine ki samla kala kham bianghynrei kawei ka dang shitom jur”.
Haba kylli, u Bah Sniawbha ula ong “Ka Sorkar kala rai ban pynlut nalade ia baroh ki jinglut jingsep ha ka jingsumar ia kine ki samla pule”.
Ula pynpaw ruh ba lehse ka lah ruh ban don ka jingphah sumar ia ki shabar ka Jylla bad ong “Lada kim lah ban sumar ia ki hangne hapoh ar-lai sngi, ka Sorkar kan sap hah sumar ia ki sha ki hospital shabar ka Jylla”.
U DyCM ula pynbna ba ki Pulit kila kem ia u nongniah jong ka kali ba kyrteng u Premen M Sangma-u Security Guard ka NEIGRIHMS.
Kane ka jingjia kala jia ha ka janmiet sngi Nyngkong hajan ka Gate No 2 jong ka NEHU.
Ki Pulit kila register ia ka case ba pyrshang ban shim jingim briew pyrshah ia u Premen, ia kaba ka medical report ka pynpaw ba ula buaid bha ha ka por ba jia kane ka jingjia.
