Shillong, Naitung 12 : Ka Myntri Pla Tyngka ka Ri Nirmala Sitharaman, ha ka sngi Saitjain kala leit iuhkjat ha ka Jingkieng Diengjri ba pawnam ka Shnong Siej, kaba don ha East Khasi Hills District.
Ka Myntri kala ioh iakren iakhana ruh bad ki riewrangbah ka shnong, ki nongialam shnong bad ki nongioh bynta na ka Payment for Ecosystem Services Programme, ka prokram bala kyrshan da ka World Bank, KFW bad ADB, ban sngewthuh kumno ki Khasi kila tyngkai bad pynneh pynsah bad pynthymmai ia ki rukom pyndonkam jong ki riew hyndai hynthai ia ka mariang.
Haba ai jingkren sha ki nongshongshnong, ka Sitharaman kala pynpaw ia ka jingai jingiaroh halor ka jingstad na la tynrai kaba la tyngkai pateng la pateng ha Meghalaya.
“Nga ai khublei ïa ka shnong baroh kawei kaba la bat ïa ka mynsiem ban im ha kane ka mariang kaba jyrngam bha. La palat shispah snem, phi la pynneh pynsah ïa ka kolshor kaba burom ïa ka mariang bad pynroi ïa ka jingïaid lynti kaba neh – wat ban wad ki lad ki lynti ban pynïasoh sha shiliang ki wah khlem da pynkheiñ ïa ki dieng kiba im,” ka la ong.
Haba kren halor ka jingphylla jong ki Jingkieng Diengjri, kala ong ““Ha ka por ba ka pyrthei ka wad ïa ki lad ki lynti kiba lah ban neh, ki briew jong ka Siej ki la pyni ïa kaei kaba lah ban long lyngba ki rukom treikam kiba suk, kiba ïadei bad ka mariang. Phi la shem ïa ka lad ban im, ban ïaid, bad ban roi khlem da pynsniew ïa ka sawdong sawkun jong phi. Ka long kaba phylla ba kumno ki kam jong phi ki lah ban long ki nuksa ia ka pyrthei.”
Ka Sitharaman ka la ai khublei ruh ïa ki jingpyrshang ba dang ïaid shakhmat jong ki paidbah ban buh jingthoh bad wad ïa ka kyrdan na ka UNESCO ban ioh jingithuh kum ka jingtei u men barim ia ki Jingkieng Diengjri.
“Ka jingithuh kam dei ban iakhyllew, hynrei ban pyni sha ka pyrthei ba phi la leh nyngkong eh. Ki jingleh jong ki ym tang ba ki treikam bha-ki dei kiba lah ban pynbud. Ka jingithuh ha ka pyrthei kan iarap ban ai mynsiem ia kiwei ruh”.
