Shillong, Naiwieng 30: Ka Myntri ka Sorkar Pdeng kaba khmih ia ka tnad Women and Child Development, ka Annapurna Devi hynne ka sngi Saitjain kala leit jngoh ia ka Ri Bhoi District, Meghalaya ban khmih bniah ia ka jingpyntreikam ia ki skhim kiba la bei tyngka da ka sorkar pdeng ban kyntiew ia ki longkmie bad ki khynnah.
Ka Myntri kala sdang ia ka jingjurip da kaba leit jngoh ia katto katne ki shnong ha ka district ha kaba kala iakren bad ki longiing ha ka Transit Home bad iakren ruh bad ki longkmie kiba punkhun ha Primary Health Centre, Byrnihat.
Kala leit jngoh ruh ia ka Anganwadi Centre ha shnong Saiden, ha kaba kala iakren bad ki nongpeit ia ka centre bad ki khynnah kiba pule ha ka pre-school bad ki kam and Supplemental Nutrition Programme (SNP) bad kala peit bniah ia ka jingpyntreikam ia ki skhim bad iakynduh ia ki nongmihkhmat na baroh ki tnad bad ki bor pyniaid District ha DC Conference Hall ban khmih bniah ia ka jingpyntreikam ia ki skhim jong ka sorkar pdeng.
Ha katei ka jingialang la iakren halor ki jingeh, ki jingjop bad ka jingiaid shaphrang ha ka jingtreikam ryngkat bad ka jingmang tyngka bad ka jingpyndonkam ia ka pisa na ka NITI Aayog bad ka North Eastern Council (NEC) bad kiwei kiwei ki skhim.
Ka Annapurna Devi kala iaroh ia ki sienjam jong ka sorkar jylla, kiba kynthup ia ka Early Childhood Development Mission bad ka Chief Minister’s Safe Motherhood Scheme (CM-SMS) ha kaba kala ong, “Kane ka sienjam jong ka sorkar kadei kawei na ki rukom treikam ba biang bad ngin peit kumno lah ban pynbud ia kane ha kiwei kiwei ki aspirational district jong ka ri ban kyntiew shuh shuh ia ka koit ka khiah jong ka kmie bad i khunlung.”
“Ki dak ha kaba iadei bad ka Ri Bhoi Aspirational Distrik ki long kiba ai mynsiem bha. Mynta, ka district ka don ha ki kyrdan ba kham halor ha ki dak kiba iadei bad ki longkmie bad ki khynnah” la ong ka Myntri bad kala pynthikna ban weng ia ki jingduna ha katto katne ki bynta bad ban pynbeit ia ki jingeh kiba la pynsngew hapoh ka jingialang.
Haba kren shaphang ka jingphaikhmat jong ka sorkar pdeng ha kaba iadei bad ka thain shatei lam mihngi hapoh ka jingialam jong u Myntri Rangbahduh ka ri u Narendra Modi, ka Myntri kala ong, “Mynta, u Myntri Rangbahduh u Narendra Modi ula peit bniah ia ka thain shatei lam mihngi bad la iatreilang da baroh ki tnad kynthup ka tnad Women bad Child Development.”
Ha katei ka jingleit jurip jong ka Myntri ka Sorkar Pdeng la iadonlang u Sampath Kumar u Principal Secretary ka tnad ka koit ka khiah ka jylla, u Pravin Bakshi, Commissioner & Secretary ka tnad Social Welfare ka jylla, u Abhilash Baranwal u Deputy Commissioner Ri Bhoi, ki heh ophisar ka sorkar pdeng bad kiwei kiwei.
 bad kiwei kiwei ki skhim.){kind=link}