Shillong, Kyllalyngkot 25: Ka Dr. Ampareen Lyngdoh ha ka sngi Balang, kala leit jurip ia ka Community Health Centre kaba don ha Riangdo ban tip ia ki jingeh bad ia ki jingduna bad ban pynjanai ia kane ka jaka ai jingsumar.
Ha kane ka jingleit jurip la iadonlang u Bah Hamletson Dohling, Macmillan Byrsat, Gigur Myrthong, Dr. Jasmine Lyngdoh bad u Bah Ransom Sutnga.
Ha katei ka jingjurip, ka Myntri kala iakren bad ki Doctor, Nurse bad ki nongtrei ban sngewthuh shai ia ki jingeh kiba kane ka jaka ai jingumar ka mad bad ban thaw ia ki lad ki lynti ban pynbeit ia kitei ki jingeh.
Ka Kong Ampareen kala kyntu ia ki Doctor ba kin shimkhia bha ha kaban ai jingsumar ia ki longkmie kiba punkhun bad kala banjur iaka jingdonkam ban pynkha ia ki khunlung ha ki hospital kiba biang kiba lah ban ai ka jingsuamr kaba paka da ka jingthmu ban pynthikna ba ki longkmie kin ym mad ia kino kino ki jingma ha ka por ba ki kha khunlung.
Kala pynpaw ia ka jingsngewkhia kaba khraw halor ka jingkhlad ki khunlung kiba dang shu kha bad kala pynthikna ba ka sorkar jylla hapoh ka jingialam u Myntri Rangbah u Conrad K Sangma kala shimkhia bha halor kane ka bynta bad kala kubur iaka jingjop ha ka jingpyntreikam iaka MOTHER Scheme bad ka sorkar kala ialeh ban pynduna ia ka jingkhlad jong ki khunlung kiba dang shu kha.
Ka Myntri kala kular ruh ban thung shuh shuh ia ki Doctor bad ki Nurse katkum ka jingdonkam ban pynthikna ba ka Community Health Centre (CHC) kan treikam pura ha kaban ai jingshakri ia ki paidbah.
Katba u MDC ka thaiñ u Bah Gigur Myrthong bad kiwei kiwei kila kyntu ia ka Myntri ban phah tohkit bniah halor ki jingduna bad ki jingeh kiba iakynduh kane ka jaka ai jingsumar bad ka Myntri kala bthah ia ki heh sorkar ban lum ia ki jingtip ia ki jingdonkam ia ki tiar ki tar ban pynjanai iaka rukom ai jingsumar ha katei ka thaiñ.
