Jowai, Nohprah 06 : Ka Executive Committee ka Jaintia Hills Autnomous District Council (JHADC) hapoh ka jingialam u Chief Executive Member (CEM) ma Thombor Shiwat, hynne ka sngi ba-ar, kila hiar iuhkjat ha Shong Mukroh West Jaintia Hills, bad jurip ia ki jaka khappud ka Shnong kat kum ka map 1968.
Ka EC haba poi ha Mukroh kala iakynduh ia ki riew rangbah ka Shnong bad hiar sha ki jaka khappud jong ka Shnong ha shi linter ka surok Barato-Mukoilum bad ha Zero Point bala tip kum ka Mutha Siang Kwai, kaba jngai kumba 3-4 km na Mukoilum Police Outpost ka Assam.
Kat kum ka map bala pyni da ki riew rangbah ka Shnong, kaba la pynmih ha u snem 1968, la kdew shai ia u pud u sam jong ka Shnong Mukroh.
Kat kum ka jingbatai ki riew rangbah bad ka map bala pyni, la kdew shai baka Barato-Mukoilum bad ka surok kyndew ka dei ka Zero Point jong ka khappud Meghalaya bad Assam bad ka dang hap hapoh ka Shnong Mukroh bad ka jaka ba palat ia kane ka hap hapoh ka Elaka Labang Nongphyllut.
Haba jurip ia ka jaka ba jia ka jingther kuli ki Pulit Assam ba jia ha ka 22 tarik Naiwieng 2022, ka Executive Committee kala pynlong ia ka jingsngap ba shiminit ban kynmaw burom ia ki san ngut ki mynsiem ba khlad.
Ka EC kala iakynduh ruh ia ki riew rangbah ka Shnong ban sngap ia ki jingeh jong ki haba iadei bad ka jingwan thombor jong ka Sorkar Assam pyrshah ia ki.
