Shillong, Nailar 30: U Chief Executive Member (CEM) ka Khasi Hills Autonomous District Council (KHADC) ha ryngkat u Deputy CEM lem bad kiwei EM ka District Council, kila leit ban iakynduh kum ka dak ka jingburom ia u Lat ba thymmai ka Jylla u C.H Vijayashankar.
Iaki Nongialam ka KHADC la pdiang sngewbha da ki jingleh tynrai bad naka liang u CEM bad ka kynhun jong u ki la pynpaw ia ka jingsngewnguh ia u Lat bad pdiang sngewbha ia u sha ka Jylla.
U Lat ka jylla u C.H Vijayashankar u la iaroh ia ka jingitynnad ba phylla jong ka mariang jong ka Meghalaya bad ka jinglong ka suinbneng kaba bha.
U Lat u la ban jur ia ki jingdonkam ban pynjanai ia ka pule puthi ka ban kyntiew sted ia ka roi ka par jong ka Jylla.
U la pynpaw ruh ia ka jingsngewkhia halor ka jingeh jong u drok bad u la iasyllok bad ai buit kumno ban ialeh pyrshah ia u drok.
U la kren shaphang ka jingïada ïa ki jingthaw ba im bad u la ban jur ïa ka jingdonkam ban don ki lad ki lynti kiba khlaiñ ban ïada ïa ki jingthaw ba riewspah ha ka mariang jong ka thaiñ.
U la pynshlur ban thung ia ki jait jingthung ba tynrai ban kyrshan ia ka jinglong ryntih jong ka mariang bad u la pynpaw ia ka jingdonkam kaba kongsan ban pynneh pynsah ia ki marpoh khyndew, ki tyllong um hapoh ka Jylla.
Naka liang u CEM bad ki EM ki la ïathuh ïa u Lat ka Jylla halor ki rukom treikam tynrai jong ka imlang sahlang Khasi, kynthup ki Dorbar Shnong, Elaka bad ka jingdon ka Council bad kila batai bniah ïa ka kamram jong ka KHADC.
U CEM u la kdew iaki sienjam ba la shim da ka KHADC kaba thmu ban pynneh pynsah ïa ka tynrai, ïa ka mariang, bad ban kyntiew ïa ka bha ka miat ha ka imlang sahlang.
Ka kynhun u CEM kala iawer ruh ia u Lat ka jylla ban leit jngoh ia ki law kyntang ‘Sacred Grove’ bad ia ka Khasi Heritage Village ha Mawphlang bad naka liang u Lat u la buh por ban leit sha Mawphlang ha ka 3 tarik Nailur.
U Lat ka Jylla u C.H Vijayashankar u la pynpaw ïa ka jingkitbok kitrwiang sha ka KHADC bad pynthikna ïa ka jingkyrshan jong u.
 ka Khasi Hills Autonomous District Council (KHADC) ha ryngkat u Deputy CEM lem bad kiwei EM ka District Council, kila leit ban iakynduh kum ka dak ka jingburom ia u Lat ba thymmai ka Jylla u C.H Vijayashankar.){kind=link}