Shillong, Naitung 04: Ka Committee on Empowerment of Women jong ka ïingdorbar thawaiñ ka jylla ha ka sngi Baar kala lum iaka jingialang ha West Garo Hills Deputy Commissioner’s Office, Tura.
Ha katei ka jingialang la wan ban iashimbynta da ki Deputy Commissioners ka West Garo Hills bad South West Garo Hills, u Superintendent of Police ka South West Garo Hills bad kiwei kiwei ki heh ophisar bad ka jingthmu kaba hakhmat hi kadei halor kiba bun ki mat khamtam ia ki kam thombor pyrshah ia ki kynthei bad ia ki khynnah rit.
Ia katei ka jingialang la lum da ka Chairperson jongka Committee ka Kong Santa Mary Shylla, ha kaba la iadonlang ki dkhot kiba dei ki MLA kiba kynthup ia u Marthon J Sangma, Bah Matthew B Kurbah, Ba Brightstarwell Marbaniang, Ba Gabriel Wahlang bad u Bah Damanbiat Lamare.
Ha katei ka jingjurip, ka Committee kala iakynduh ruh ia ka samla kynthei kaba la shah thombor hakhmat u paidbah, kaba dang jia dang shen ha ka shnong Lower Teksragre, Damal A.sim.
Kane ka khynnah kaba la shem lanot mynta ka don hapdneg ka jingshah sumar sukher hapoh ka One Stop Centre ha Tura, West Garo Hills.
Ka Kong Santa Mary Shylla kala pynpaw ba ka jingialang kala iakren halor ki mat ki bapher bapher kiba kongsan ha kitei ki ar tylli ki district da kaba phaikhmat kyrpang shalor ki kam thombor pyrshah ia ki kynthei bad ki khynnah rit. Kala ong ba ka Committee ka don jingthmu ban shimkhia ia kitei ki mat bad ka sorkar jylla ban pynpaw ia ka jingdonkam ban don ia ki Shelter Homes bad Psychiatric Services.
Ha kaba iadei bad ka jingiakhynduh bad ka khynnah kynthei kaba la shah thombor kaba na ka shnong Lower Teksragre, ka Chairperson kala pyntip ba ka jinglong jingman jong katei ka khynnah kala nang bha.
