Shillong, Naitung 04: U Chief Secretary ka Meghalaya u Bah DP Wahlang hynne ka sngi, ula lum ka jingialang bishar kam halor ka jingwan lynshop u lapbah hapoh ka Jylla.
Ha kane ka jingialang, u Chief Secretary ula pan kaiphod na baroh ki bor district haba iadei bad ki jingshah pynjulor ba kynthup iaki surok bad ki lad lynti bala shim naka bynta ban iarap iaki lanot bad ka jingdon pisa naka bynta ki lad jingiarap.
Ha kane ka jingialang, ki Deputy Commissioner (DC) bad ki ophsiar na ki district kila shim bynta lyngba ka Video Conferencing.
U Chief Secretary ula ban jur iaki Deputy Commissioner ban ai jingkhien haba iadei bad ki surok kiba pyniasoh iaki shnong ki thaw, ki iing ba shah pynjulor, bad ki lad jingiarap iaki longing ba shah ktah.
Ha kane ka jingialang, ki Deputy Commissioner kila batai iaki kaiphod bad na ka liang u CS ruh ula pynpaw iaka jingsngewhun bad ula iaroh ia ki bor district kiba la ialeh katba lah ban iarap iaki lanot.
U CS ula ban jur baka long kaba donkam ban long kiba peit pyrman bha haba iadei bad ka jinglong jingman namar ka jingther u lapbah bad ula pynpaw ruh ba naka liang u Myntri Rangbah ka Jylla u Conrad K Sangma, ula sngewkhia halor ka jingjulor ki surok bad ka jingtwa khyndew.
Ula kyntu iaki Engineer ban peitngor bad pynsted iaki lad jingiarap ha kino kino ki khep ba shah pynjulor namar u lapbah.
