Tura, K’lyngkot 15 : Ka President ka Ri Droupadi Murmu kala buh syntiew ban kynmaw burom ia u (L) PA Sangma, MP barim ka Lok Sabha bad Kpa u Myntri Rangbah ka Jylla Conrad K Sangma, hynne ka sngi Nyngkong ha Tura.
La synran ia ka President da u Lat ka Jylla Phagu Chauhan, u Myntri Rangbah ka Jylla Conrad K Sangma, MP ka Tura Agatha K Sangma, u Myntri barim ki kam pohiing ka Jylla James K Sangma bad ka Kmie u Myntri Rangbah Soradini K Sangma.
Ka President Murmu kala wan poi ha Baljek Airport kaba don ha Jengjal, West Garo Hills hynne ka janmiet sngi Nyngkong ban plie paidbah ia ka 5th Meghalaya Games 2024.
Ia ka President la pdiang sngewbha da u Lat ka Jylla, u Myntri Rangbah ka Jylla bad u Myntri ka tnad pule puthi Rakkam Sangma nalor ki kynrem ki lyndan.
Kane ka jingwan iuhkjat ka President ka long kaba shongdor bha namar ka dei ruh kaba mihkhmat na ka Jaidbynriew Riewlum. Ka dei ka President ba nyngkong eh jong ka Ri India ka ban sahmiet ha Tura.
Kane ka dei ruh ka sien ba nyngkong ha ki sanphew snem ba ia ka Meghalaya Games la pynlong shabar jong ka Nongbah Shillong.
