Shillong, Nohprah 06: Ki nongialam ka Sur ka bri u Hynniewtrep (KSKBUH) hynne ka sngi kila leit kynduh ia u bah Cyril Diengdoh u badei ruh u Political Secretary ka sorkar jylla ban buddien halor ka jingslem ka sorkar ban pan jingpynshai naka Tactical Team 1 halor ka jingsiat iap ia u nongialam barim ka sengkieng atiar ka HNLC u bah Cherishterfield Thangkhiew (Bam Kwai Dwar U Blei).
U nongialam ka Sur ka Bri U Hynniewtrep u bah Thomas Passah u la iathuh ba u Political Secretary ka sorkar jylla u la kular ban buddien iaka jingdawa ban pan jingpynshai naka Tactical Team 1 haba iadei bad ka jingleit kynra iaka ïngsah u bah Cherishterfield Thangkhiew (Bam Kwai Dwar U Blei).
U bah Thomas u la ong ba kane ka jingpynslem ka sorkar ban pan jingpynshai kadei tang ka buit ban pynslem iaka jinglap halor ka jingjia bad kumjuh ruh ban pynklet iaki paidbah halor ka jingshah siat iap u bah Cheristerfield Thangkhiew.
“Ka Sur ka bri u Hynniewtrep ka kren da ka ba shai sha u myntri rangbah ka jylla ba ki paidbah kim pyndem bad kin iai buddien iaka jingdawa ban ai ka jingbishar ka ba hok ia u bah Che bad iaka ing ka sem” la ong u bah Thomas.
U bah Thomas u la ong ba lada ka sorkar ka don iaka mon ka lah ban pynurlong ia kane ka jingdawa ba ka KSKBUH bad ki paidbah kila dawa mynta la shisnem tam.
Lah ban kdew ba ka KSKBUH ka pynpaw ka jingbym hun iaka kaiphod bala tohkit da u Justice Veiphei ia kaba ka sorkar kala rah shapoh ka ing dorbar haka 9 tarik Nailur.
