Shillong, Naitung 07 : Kum ka briew kaba burom bad ba sheptieng ia ka Ain, kala ialam iala u jong u khun ban aiti sha ka ain hadien ba shah thwet bad shah khot hajir namar ki kam iashoh briew hynrei phewse ynda kala leit shaw hadien ka por bala buh ban wan shaw, la lap pynban ba ki Pulit kila shoh dusmon ia une u Khun haduh ba ula shitom jur bha.
Kane ka jingjia kala jia ha ka 3 tarik Naitung ha Sohra Police Station. Une uba shah shoh u kyrteng u Getwin Jyrwa ba dang 19 snem ka rta, Khun jong I kong Mildred Jyrwa.
Namar ka jingbitar ia ka jingleh tohmet jong ki Pulit ka Sohra Police Station, I Kmie Kong Mildred Jyrwa ila leit ujor da ka ejahar sha u Superintendent of Police ka East Khasi Hills Bah Vivek Syiem. Ine I Longkmie ila leit buh ruh ia ka jingujor hakhmat ka Meghalaya Human Rights Commissin (MHRC).
Ha ka ejahar, I kong Mildred ila iathuh ba ha ka 3 tarik Naitung, haba i ioh khubor ba ki Pulit ka Sohra Police Station kila wad ia u khun jong i, ma I hi kum ka Kmie, ila leit ialam ia u khun sha Police Station ha ka por 9 baje mynstep hynrei ha ka por 2 baje janmiet haba I leit shaw ia u, la lap pynban ba ula mynsaw jur na ka jingbom, jingpynshitom tohmet ki Pulit.
“Mar mar nga la ialam noh ia u sha Sohra CHC bad nangtei kila phah noh ia u sha Shillong Civil Hospital ban ioh ia ka jingsumar. Mynta u dang don ha kane ka jaka sumar bad la buh ban pyllait noh ia u ha ka 7 tarik Naitung” iathuh I kong Mildred ha ka ejahar.
Kat kum ka jingiathuh jong I, u Getwin ula iashoh briew ha ka 28 tarik Jylliew bad ki Pulit kila khot hajir ia u sha Police Station ban tohkit hynrei u Getwin u khlem leit mih satia, kaba la pynlong ia ki Pulit ban wan wad na iing bad bthah ruh ban phah wan mih ia u sha Thanad.
“Kum ka Kmie, nga tieng ban phah ia u mynmiet bad kumta, nga la leit buh hi mynstep sha Thanad. Ki Pulit kila kylli pyrthew bniah ia nga bad hadien kila phah noh ban leit sha Iing. Hynrei ynda nga leit shaw, nga la lap pynban ia u Khun hapdeng ka jingmynsaw jur” ila iathuh.
I Kong Mildred ila kynthoh ba lada u Khun jong u, ula leh ia ka kam kaba shyrkhei kaba dawa ia ka jingpynshitom, ki Pulit kila dei ban iaid kat kum ka lynti jong ka ain ym ban shu shoh shu bom hapoh Police Station bad sa pyllait noh hadien.
I ong ba kane ka jingleh ki Pulit ka dei ka jingpynkhein ia ka hok longbriew u khun jong I haba dawa ia u Superintendent of Police ba u dei ban ai ka jing pynshitom ia ki Pulit kiba donkti ban shoh dusmon ia u Khun jong i.
I Kong Mildred ila dawa ruh ba ki pulit kidei ban siew ia ka jinglut jingsep bad udei ban ioh ia ka jingbishar hok namar kane ka jingpynshitom jong ki pulit ka Sohra Police Station ia u khun jong i, ka long ka bym lah ban pdiang haduh ba tang ba u leit shabar ruh ym lah shuh.
