Shillong, Naiwieng 09 : Ka Federation of Khasi Jaintia & Garo People (FKJGP) kala ai jingkyrshan ia ka jingiakhih jong ki samla pule ka NEHU, ba dawa hiar shuki ia u Vice Chancellor Prof PS Shukla nalor ka jingwengkam mardor ia u Registrar, Deputy Registrar bad ki Ophisar kiba la kynnoh thep kam be-ain da u Vice Chancellor.
Ki Nongialam ka FKJGP ha ka 7 tarik Naiwieng, kila leit ban jngoh ia ki samla ba shong shah thngan ha NEHU Campus bad iakynduh ruh ia ki nongialam jong ka North Eastern Hill University Students Union (NEHUSU) bad KSU-NEHU Unit.
“Ka FKJGP ka ai ka jingkyrshan ba pura ia ka jingdawa bad ka jingiakhih jong ka NEHUSU bad KSU-NEHU Unit.Ka kitbok kitrwiang ba kane ka jingikhih kan poi sha ka thong haba ai mynsiem ia baroh ki samla pule kiba shim ia ka sienjam ban shah thngan khlem pud” ong uAtt General Secretary ka FKJGP-Sengkmie Bah Reginald Thabah uba ialam ia ka kynhun ka seng sha NEHU.
“Ka FKJGP kan iai kyrshan bad kan don ha syndak jong ki (samla pule) ha kane ka jingiakhih” ula bynrap.
Ha kajuh ka por, ka FKJGP kala pynpaw ia ka jingsngew diaw halor ka kynrum kynram kaba mih ha kane ka skul bah, kaba la ktah ia ki samla pule kiba dei ki lawei jong ka Jaidbynriew.
“Ngi sngewkhia namr ki samla pule ha ka jaka ba kin shong ha ki kamra klas ban ioh ia ka jingnang jingstad, pyban kila hap ban mih shah thngan khlem buh por namar ka jingleh donbor jong u Vice Chancellor” ula ong.
Kiwei pat ki nongialam ka FKJGP kiba la leit lang sha NEHU ki kynthup ia u President ka Shillong City Bah Arkin Field Khonglam, u Asst General Secretary ka Sengkmie Bah Constantine Mawlong bad ki dkhot ka FKJGP Shillong City.
 kala ai jingkyrshan ia ka jingiakhih jong ki samla pule ka NEHU, ba dawa hiar shuki ia u Vice Chancellor Prof PS Shukla nalor ka jingwengkam mardor ia u Registrar, Deputy Registrar bad ki Ophisar kiba la kynnoh thep kam be-ain da u Vice Chancellor.){kind=link}