Shillong Jymmang 16: U Myntri ka Sorkar Jylla u Bah Sanbor Shullai uba long ruh u MLA ka Shillong South ha ka sngi Thohdieng ula leit ban ialehkmen bad ki khunswet jong ka Borsing Childrens Home kaba don ha Mawsmai, Sohra bad ula sam ruh ia ki song jingiarap bad ia ki jingai sngewbha.
U Bah Sanbor ula sam ia ki son jingiarap kiba kynthup ia ki marbam mardih, ki jain ki nep bad ia ki tiar ban pyndonkam shimet ki khynnah bad ula aiti ia kine ki song jingiarap ha u Pastor R Bareh ha ryngkat ka jingdonlang ki nongpeit ia ki heprit.
Haba kren ha ka jingialang u Bah Sanbor ula ong, hadien ba ula wan jngoh ia ki ha u bnai Kyllalyngkot mynta u snem ula dep ban kular ban sa wan biang ryngkat bad ki song jingiarap bad u dap da ka jingkmen ba un ioh ban iadonlang bad ki baroh ha ryngkat bad ban lah ban ai ia kine ki jingai sngewbha.
Halor ka jingkyrpad u Pastor ban pynioh ia ka Hall ban pynlong ia ki jingai jinghikai khnang ba ki khynnah kin lah pat ban kamai bad ban ieng ha la ki jong ki kjat, na ka liang u Bah Sanbor ula kular ban shimkhia ia kane bad ban leit pynsngew ha u Myntri Rangbah ka jylla ban shimkhia ia kane ka jingangnud ka jongki.
