Nongstoin, Nohprah 21: Ka KSU West Khasi Hills District Unit ha ka 20 tarik Nohprah 2022, ka la ialeh kmen Christmas bad ki 8 ngut ki khynnah skul kiba shem jynjar shem lanot, kiba ka Seng ka la kyrshan ba kin ioh leit skul.
Ia kane ka jingialang la pynlong ha ka K.K.Vani Hall Nongstoin, West Khasi Hills District.
U Samla Willbest Wanniang Education Secretary KSU West Khasi Hills District Unit ula pyniaid ia kane ka jinglehkmen ha ka jingiadon ryngkat ki Nongialam jong ka KSU West Khasi Hills hapoh ka jingialam jong u President samla John Fisher Nongsiang bad kiwei kiwei.
La iadon ryngkat ruh ki Nongialam jong ka KSU CEC naduh u Samla Raymond Kharjana Education Secretary KSU CEC kum u Kongsan ha katei ka lympung jingialang.
Na ka liang jong u Kongsan jong ka jingialang, u la ai ka jingkitbok kit rwiang ia ka seng KSU West Khasi Hills District Unit, ba kan nang iai kner ia ki jingiarap na ka bynta u duk u rangli bad kiba shem jynjar shem lanot.
U la kitbok kyrpang ruh ia ki hep samla kiba ka Seng ka la ai jingkyrshan bad kyntu ba ki dei ban trei shitom ha ki jingpule jong ki.
U la ong ba kum ka Seng kam kwah eiei ia ki jingleh kylliang na ki, hynrei ka Seng ka kwah ba kin siew kylliang da ki kam kaba ki leh na ka bynta ka Ri bad ka Jaitbynriew.
