Shillong, Nohprah 23: Ka Meghalaya kala ialehkai bha hynne ka sngi Thohdieng, pyrshah iaka Arunachal Pradesh ha ka sngi baar jong ka Semi Final jongka U-19 Men’s Cooch Behar Trophy kaba la long ha Anand, Gujarat.
U Banialam Mylliemngap ula pyntroin ia ka Arunachal da ka jingkawang bha iaka bol ha kaba ula shim 6 wiket bad ai 28 run katba u Shubham ula kamai 111 run haba ka Meghalaya kala leit tied ha ka sien ka baar bad kala tam syndon da 417 run ia ka Arunachal.
Hynnin ka sngi, ka Meghalaya kala kamai 220 run bad hap lut ki nongtied ha ka jingleit tied kaba nyngkong bad haba ka Arunachal kala leit ban tied hynnin ka sngi kala kamai 53 run bad hap 1 wiket bad kala donkam ban kamai sa 169 run ban tam ia ka Meghalaya.
Hynrei hynne ka sngi, haba ka Arunachal kala leit ban tied biang, kam shym la lah ban kyrda ha ki nongkawang bol ka Meghalaya bad kala kamai tang 83 run bad hap lut ki nongtied bad kane kala pynlong syndon ia ka Meghalaya ban tam da 137 run.
U Banialam ula shim 1 wiket hynnin ka sngi hynrei hynne ka sngi pat ula shim 5 wiket, katba u Angkit Tamang ula ioh 4 wiket.
Ka Meghalaya haba kala leit ban tied ha ka sien ka baar, kala kamai 7 run ha ka shi Over ha kaba u Manthan Dey ula kamai 42 run na ka 24 bol, katba u Shubham ula kamai 111 run bad u Avinash Rai ula kamai 51 run.
U Shavian Blah ula kamai 17 run bad u Angkit 8 run bad kine haduh mynta kim pat Out bad ka Meghalaya haduh hynne ka sngi kala kamai 280 run bad hap 6 wiket.
U President ka Meghalaya Cricket Association u Naba Bhattacharjee ula ai khublei ia ka jingtrei shitom jong ka kynhun baroh kawei bad khamtam ia u Banialam bad ia u Shubham kiba la ialehkai bha wat la kane ka jingiakhun ka dang sah bad kam pat kut.
