Shillong, Naiwieng 23: Ka jingiai ap khmih lynti ia ka kawei pat ka lumpung ialehkai phutbol ha kane ka nongbah-ka Shillong Sports Association Champions Cup 2025, kan sdang noh naduh lashai ka lah sngi U Blei, ka 24 tarik Naiwieng 2025, ha SSA Stadium, First Ground, Polo.
Kane ka lympung kan sdang da ki artylli ki jingiakhun kiba dei naka bynta ka Group-A.
Ka jingthmu ba sha lyndet jong kane kawei pat ka lympung ka SSA ka long ba kan lum kan lang ia baroh ki team/klob kiba long ki lahduh bad ba wan ba-ar (winners & Runner’s Up) na ki san tylli ki kyrdan ialehkai bapher bapher, kaba hangne la khmih lynti ba katta ka dur ka dar ka jong ka, kan da iapher bak lybak na ki lympung kiba ka juh pynlong.
Haduh 10 tylli ki kynhun ne team, kin iakhun ha kane ka lympung ia kiba la phiah ia ki ha ki artylli ki thup (group), ha kaba ki artylli ki team/kynhun ba khur bun point kin jam patr sha ka kyrdan iakhun ka semifinal.
Ka jingiakhun plie pyrda ia kane ka lympung kan long hapdeng ka Mawkasiang (ba dei ka lahduh jong ka Fourth Division) pyrshah ia ka Mylliem Lum (ba wan ba-ar na ka Second Division ha ka por 1:00 baje nohphai sngi.
Hadien kane, yn pynbud da ka jingiakhun hapdeng ka kynhun ba rah ia ka nam lahduh ka Shillong Premier League katta ka Langsning FC pyrshah ia ka Umlyngka ( kaba wan ba-ar na ka Third Division) kaba la buh ban long ha ka por 4:30 nohphai sngi.
