Shillong, Lber 19 : Ka Dorbar Mang Tyngka jong ka ïing dorbar thawaiñ ka jylla kan sdang lashai ka Lah Sngi u Blei bad yn plie ia ka da ka jingkren lamphrang jong u Lat ka Jylla Phagu Chauhan.
Kane ka dorbar kan neh haduh 7 sngi bad kan kut haka 28 tarik u Lber.
Ha ka sngi sdang u Lat ka jylla yn ai jingkren ne Governor Address ha kaba yn batai ia ki mat kiba kongsan kaba ka sorkar kaba thymmai kan phaikhmat bad kan pynleit jingmut na ka bynta ban kyntiew iaka jylla ha baroh ki liang.
Hadien kane, yn sa pynlong ruh iaka elekshon ban jied ia u Symbud Lamphang ka ïingdorbar thawaiñ ka jylla.
U Myntri Rangbah ka jylla u Conrad K Sangma yn sa wanrah ruh iaka mang tyngka ha kane ka dorbar na ka bynta ban ioh iaka jingmynjur bad ka sorkar kan wanrah ruh ia ki Bill bapher kaba kynthup iaka Bill na ka bynta ban pynduh pyndam noh iaka aiñ khalai ne ka Meghalaya Regulation of Gaming Act 2021.
Ka sorkar jylla kan wanrah ruh ia ka Captain Williamson Sangma Technical University (Amendment) Bill hapoh ka Dorbar ban pynkylla noh sha ka Captain Williamson Sangma State University bad kan dei syndon ka State University kaba nyngkong eh haka Jylla.
Ia kane ka dorbar yn pynkut ha ka 28 tarik u Lber.
