Guwahati, Lber 09 :Ki pulit ka Assam ki la kem noh ia san ngut ki briew na ki bynta ka Nagaon bad Morigaon district ka Assam halor ka jingkynnoh donkti ha kaba pynioh ia ki SIM card sha ki dkhot tnat syntiat ka Pakistan.
Hadien ba la ioh ia ka jingtip kaba bniah, ki pulit ka Assam ki la pynlong ka jingkhynra bad ioh ban kem noh ia san ngut ki briew kiba donkti ha kaba pynioh ia kine ki SIM card sha kitei ki dkhot ka tnat syntiat ka Pakistan.
Ia kitei ki briew kiba la shah kem noh la tip kyrteng kum u Ashiqul Islam, Bodor Uddin, Mijanur Rahman bad u Wahiduz Zaman, baroh kiba dei na Nagaon katba u Baharul Islam u dei na Morigaon.
Haba kren sha ki lad pathai khubor, u nongaiktien ki pulit ka Assam u Prasanta Bhuyan u la ong, “Ngi la ioh jingtip ba ki don kumba 10 ngut ki briew na kitei ki artylli ki district kiba donkti ha ki kam lehthok na ka bynta ban ioh ia ki CIM card na ki jaka bapher bapher bad kiba la pynpoi sha ki katto katne ki dkhot ka tnat syntiat ISIS ka Pakistan, kata kaba buh ka jingma pyrshah ia ka jinglong jingman bad ia ka synshar khadar jong ka ri hi baroh kawei.”
U la ong ruh ba ka jingthwet ban ioh kem ia ki san ngut kiwei pat kiba la phet krad noh ka dang iaid shakhmat.
“Kawei na ki mobile phone ba la ioh kurup na uwei napdeng kine ki briew kiba la shah kem ki don artylli ki IMEI nombor la kynnoh ba la pyndonkam ha kaba ia phone lyngba ka WhatsApp bad ai ruh ia ki jingtip kiba iadei bad ki jingtreikam jong ka tnat iada ri bad ka ophis kam bar ri,” ong u heh pulit.
Ki bor pulit ki la ong ba ki la ioh ban kurup haduh 18 tylli ki mobile phone, 136 tylli ki SIM card, kawei ka scanner fingerprint, kawei ka high-tech CPU bad katto katne ki kot ki sla kum ki syrnot sngi kha, ki passbook bad ki dur na ka iing jong kitei ki briew kiba la shah kem noh.
