Itanagar, Iaiong 02 :Hynnin ka sngi Saitjain la lapdien ia ka metiap jong u heh shipai uba ha ka kyrdan Subedar, kata san sngi hadien ka jingjia twa khyndew ha ki bynta jong ka Tawang sector ka Arunachal Pradesh.
Katkum u nongaiktien ki shipai la ong katba ki dang iashim bynta ha ki kam kilan met ha ki bynta ba shakhmat jong ka Tawang sector, ka kynhun shipai ka la ngat kynsan ha ka jingtwa khyndew kaba shyrkhei ha ryngkat ka jingkhyllem jong ki dieng, ki maw bad ka khyndew ktieh.
Ha kane ka jingjia baroh ki la ioh laitim khlem kano kano ka jingmynsaw jur lait noh u Subedar A.S. Dhagale, uba la shah tep im ha ka khyndew. Hadien kane mardor la pynlong ia ka jingwad ban lapdien pat ia u.
“Hadien ka jingwad kaba la neh saw sngi kynthih da kiba bun ki kynhun kiba la pyndonkam ha ryngkat ki tiar jingiarap kiba kyrpang kumta ruh la lapdien ia ka metiap jong une u shipai na katei ka jaka bad pynkynriah noh shapoh District Hospital, Tawang,” Ong u nongaiktien.
U Dhagale uba dei na Ratnagiri district ka Maharashtra ula iehnoh shadien iala ka kurim bad arngut ki khun kynthei.
