Shillong, Iaiong 30 : Kawei ka kynthei Khasi ba kyrteng ka Agatha Ba Ithianghun Khongwet, kaba dei shnong na Tangmang, Pynursla, la lap ba kala iap hala ka jong ka Iing sah wai ha Hebbal, Bengaluru ha ka janmiet sngi Balang, kaba ia pynlong ia ki Pulit ban tohkit ban lap ia ki daw tynrai ka jingiap jong ka.
Ia ka met la lap hapdeng ka por 7 baje janmiet haduh 7:30 baje janmiet, ong ka Khasi Students’ Union (KSU) Bengaluru Unit ha ka kyrwoh ha ka sngi Palei.
“Ka Agatha Ba Ithianghun Kongwet, ka nongshongshnong ka shnong Tangmang, Pynursla, East Khasi Hills, Meghalaya….la shem ba kala iap hynnin hapdeng ka por 7 baje mynmiet haduh 7:30 baje mynmiet hala ka jong ka iing wai ha Hebbal, Bengaluru” ong ka KSU haba pynpaw ia ka jingsngewlem ia ka jingkhlad ba khlem dei por jong ka.
Kat kum ka jingong ka kSU, ka Agatha la ioh jingtip ba kala iasah lang bad uwei u shynrang ba suba dei u samla, uba kyrteng u Nawaz Sharif ba na Manipur.
Ka daw jong ka jingiap ym pat shym la lah ban pynthikna.
“Kane ka jingjia ka dang don mynta hapdeng ka jingtohkit bad la suba jur ba ka dei ka kam dkhat jubor iala ka jingim/ ka jingshah pyniap hynrei ym pat lah ruh ban pynthikna ia kiwei pat ki daw” ong ka KSU.
Ki dkhot ka KSU Bengaluru Unit kila poi mar mar sha katei ka jaka tang mar syn tip ia ka jingjia.
“Ki dkhot ka KSU Bengaluru Unit kila iadonlang hynnin ka sngi ha ryngkat bad ki paralok jong ka, bad kala ai ia ki jingiarap kiba donkam” ong ka Union.
‘Ka KSU ka dawa ia ki borkhmih ba kin pynlong ia ka jingtohkit ka bym shah liang bad kaba long bniah bha” kala bynrap.
