Shillong, Naiwieng 19: Ki nongialam jong ki saw tylli ki sengbhalang hynne ka sngi Saitjain, kila leit ban jurip iaka jingshna iaka surok na Mawduh ban leit sha Kshaid Weinia jong ka Dewlynnong Nongkhnum bad kila shem ba u kontraktor ula shna torti ia kane ka surok kaba don ha West Khasi Hills.
Ki saw tylli ki sengbhalang kiba la leit jurip ia katei ka surok ki kynthup iaka MYF, UHM, WKHSU bad WYF bad kane ka jingleit jurip ka jong ki kadei hadien ba kila ioh iaki jingujor na ki paidbah ba ka surok kaba la shna ha katei ka thaiñ kadei kaba la shu pyntrei torti da u kontraktor.
Ki nongialam kiba kynthup ia u bah Hamar Nyngkhoi na ka WYF, u Bah D Sun na ka WKHSU bad u Bah M Nongrem na ka UHM ki la hiar dalade ban jurip ia katei ka surok bad ki la lap da la ki jong ki khmat iaka jingtrei torti kaba la long shaba palat u pud bad ka rukom siang rong ruh kam shim la long haka lynti kaba dei hynrei la shu trei torti khlem da bud ia ki kyndon kaba long katkum ka rukom ba dei ban siang rong.
Ha kane jingleit jurip, ki nongtrei jong u kontraktor kila wan tur bad pyninia bad pyrshang ruh ban khang jubor ia u nongthoh khubor bad ki nongring video hynrei hadien katto katne por, la lah ban pynsngewthuh ia ki halor ka jingwan jurip jong ki nongialam sengbhalang na ka bynta ka jingbha jong ki paidbah nongshong shnong ka thaiñ.
