Nongpoh, Rymphang 24: Katto katne ngut ki rawon ki la lap ia ki shyieng briew kiba sahkut ha ki tyngkhap maw jong ka wah Umran, ia kiba la suba jur ba ki lah ban dei jong u rangbah u ba jah rngai hadien ba hap bad ngam jyllop ha kane ka wah ha ka dong Iewsier jong ka shnong Saiden.
Katkum ka khubor, la iathuh, ba hynne ka sngi Ba-ar, katto katne ki rawon kiba la leit khwai sha ka wah Umran, ki la lap ia ki shyieng briew kiba tyngkhap ha maw.
Kine ki rawon kila pyntip marmar sha ki bor pyniaid shnong bad ruh sha ki bor pulit bad hadien la pyntip ruh sha ki bahaiing jong u rangbah u ba la jah rngai ha katei ka wah khlem lapdien shuh lah phra bnai mynta.
Ka dei ha ka janmiet jong ka 27 tarik Naitung 2025, u wei u rangbah ba la tip kyrteng kum u Elbi Nongshli na ka shnong Umtasor, katba u dang ia shongkai halor ka jingkieng jong ka wah Umran, ha ka dong Iewsier, ula hap shapoh ka wah Umran bad wat hapdeng ka jingpyrshang ban ia wad shnong ha ryngkat ki bor sorkar kim shem la lap satia ia ka met jong u tei u rangbah haduh mynta mynne.
Ki pulit ka Nongpoh Police Station ki la hiar sha katei ka jaka ban pynlong ia ka jingtohkit bad ruh ban khmih bniah la kitei ki shyieng briew ki dei ne em jong u rangbah ba hap nalor ka jingkieng.
