Shillong, Nailar 11: Ki Pulit kiba tohkit ia ka jingiadonbynta kam bymman jong u Vice President ka BJP bad MDC ka GHADC Bernard N Marak ba khot sin u Rimpu, kila lap pynban mynta ia ka pisa ba kot da ki klur tyngka ha Account jong une u MDC ki bym don satia ia ki sakhi ban pynshisha nangno ba u ioh ia kane ka pisa.
Ia kane la pyntip da u Superintendent of Police ka West Garo Hills Vivekanand Singh Rathore hynnin ka sngi balang hadien ba ka Iingkashari kala hukum ban set ia une u MDC hapoh ka Judicial Custody ba 14 sngi nalor ka jingaibor ia ki Pulit ban kem biang ia u na phatok ha kawei pat ka case ba iadei bad ka jingioh kurup tiar pynbthei na Rimpu Bagan, ka Farmhouse jong une u MDC.
“Ka don shibun bah ka pisa ba kot da ki klur tyngka ha ka bank account jong u Bernard hynrei haba kylli tohkit, u khlem lah satia ban ai ia ka jubab nangno ba u ioh lane don ki kot ki sla ban pynshisha ba nangno kane ka pisa ka wan.” Ong une u Heh Pulit.
“Ka pisa ba hapdeng T. 50000 haduh T 1 lak ka dei kaba la thep manla ka por ha ka account jong u hynrei ym shym la lah ban ai ia ki sakhi ba nangno kane ka pisa ka wan” ula bynrap.
Kat kum ka jingong jong u, ka jingtohkit kan wad tynrai ia kane ka pisa baroh ban pynthikna nangno ba ka wan bad kumno ba une u MDC u ioh ia ka.
Ki Pulit ka Ri-lum Garo kim hun satia ia ka jubab jong une u Nongialam ka BJP uba la pyrshang ban thet kti da ki jingkam ba lai phew jait.
“Nyngkong, ula kam ba kane ka pisa ka dei kaba wan na ka skhim ka sorkar hynrei haba pan ia ki sakhi satar, u khlem lah satia ban ai” ong une u Heh Pulit.
Ioh jingmyntoi u Bernard na ka bai thied jaka ka Sorkar
La shem ba une u Nongialam ka BJP ula ioh ia ka bai thied jaka jong ka Sorkar ban shna ia ka surok Highway lyngba ka shnong Daren Agal, kaba don shabar ka Tura ha ka surok sha Dalu. Une u MDC ula ioh haduh T. 50 lak ka pisa na kaba die jaka.
Kane ka jaka ba die ka dei ka juh ka jaka kaba u Bernard ula buh ia ka ktem ban pynsah ia ki ehrang ka ANVC-B. Kane ka ktem ka dei kaba la khynra da ki Pulit ha ka miet 11 tarik Kyllalyngkot 2014 hadien ka jingsuba kawang bomb IED ki ehrang ka ANVC-B ha kawei ka petrol pump ha Tura.
U Bernard ula lait salit ha kane ka jingkhynra hynrei saw ngut ki ehrang kiba don ha kane ka ktem, kila kyllon iap ha ka jingiather kuli bad ki Pulit.
Ioh u Bernard ia ka song jingiarap ia ki ehrang ANVC-B haduh 3 snem kynthih
Da ki snem, une u Chairman ka ANVC-B Bernard N Marak ula kynnoh ia ka Sorkar Pdeng bad ka Sorkar Jylla ba kim lah satia ban pynurlong ia ki jingdawa kat kum ka soskular iasuk haba kynnoh ruh ba ki ehrang kim pat ioh satia ia ki song jingiarap pisa ba dei hok ban ioh.
Hynrei, ka jingtohkit ba mynta jong ki Pulit kala lap ba une u Chairman barim ka ANVC-B ula ioh ia ka bhah song jingiarap na ka sorkar Pdeng bad Sorkar Jylla mynta la palat lai snem.
“Ula ioh ia ka song pyndem wait ba kot T. 1.5 lak mynta la jan saw snem. Kane ka pisa ka don ha ka bank account jong u” pyntip u Vivekanand kaba long ruh kum ka jingsei madan ia ki kam thok jong une u Nongialam kynhun kaikhlaw uba ju ud baroh shikatta ia ka jingleh kmienah jong ka sorkar haba phai sha ka ANVC-B.
