Nongpoh, Lber 10 : Tang hadien katto katne sngi ba ujor ka Synjuk ki Rangbah Shnong Rud Wah Umpli, ki bor pyniaid district ka Ri-Bhoi ha ka sngi Ba-ar, kala hiar jurip ia ka surok PMGSY na Umden sha Byrnihat, ba pyntrei da ka kompani MP Aggarwal bad lap dala ki jong ki khmat ia ki bynta jong ka surok bala shu pyntrei torti.
Ia kane ka jingjurip la lamkhmat da u Assistant Commissioner Akash Marak, ki Engineer ka tnad PWD ha ryngkat ka jingia donlang u Chairman ka Synjuk ki Rangbah Shnong Rud Wah Umpli Bah Henry Nongrum, u Organising Secretary Bah Coming Ingti bad kiwei kiwei.
Lah ban kdew hangne, kane ka surok PMGSY na Umden-Byrnihat ka dei kaba jrong kumba 38.7 km bad kaba ai ka jingshakri ia palat 23 tylli ki Shnong.
Haba kren bad ki nongthoh khubor hadien ka jingjurip, u Bah Henry ula iathuh ba ha kane ka jingjurip, la ialap dala ki khmat ia ki bynta jong ka surok bala pyntrei torti da ka kompani MP Agarwal Pvt Ltd, kaba la siang rong stang shaba palat, kaba lah ban khoh da ka kti. U ong ba kane kala pynduh jingkyrmen ia ki paidbah kiba khmih lynti ba ka surok kan neh slem kat kum ka jingmang pisa.
U Bah Henry ula pynpaw ia ka jingsngewnguh ia ki bor district kiba la sngap ia ka jingujor ka Synjuk bad khamtam eh ia u Symbud Myntri Rangbah ba khmih iaka tnad PWD Bah Prestone Tynsong, kiba la shimkhia ban phah jurip mardor ia ka rukom shna ia kane ka surok.
Na ka liang ki Ophisar kila pynpaw ba ia kaei kaba ki shem ha ka jingjurip, kin sa pynkhreh da ka kaiphod ban sa aiti sha u Deputy Commissioner, ba un lah ban shim ia ki rai ba donkam.
