Nongpoh, Naitung 22: Ka Meghalaya State Olympic Association (MSOA) hynne ka sngi thohdieng, kala shem ia lai ngut ki Heprit na Ri-Bhoi District, kiba la iakot kat ka kyrdan International Level ha ka jingiakop mareh ladder run bad vertical jump
Kine ki heprit ki dei u heprit Rooney Lyngdoh ba dang 11 snem ka rta, ka samla Badahunlang Syngkli ba 18 snem bad u Kitboklang Shangpliang.
Ia ka sap ialehkai jong kine ki heprit bad ki samla ialehkai, la lap na ka State Talent Identification programme 2022 jong ka MSOA bad ka Directorate of Sports & Youth Affairs ka Jylla, kaba la pynlong hynne ka sngi ha Indoor Stadium Nongpoh, kaba la wan iashimbynta da ki Khynnah skul bad ki Club bapher bapher jong ka District.
Kumba la maitphang, ka jingthmu jong kane ka rynsan ban ithuh ïa ka sap ba kynsai jong ki heprit ha kaba napdeng ki heprit kiban shah jied, kin sa ïoh pat ïa ki lad ai jinghikai kiba paka lyngba ki nonghikai ba kynsai ka jylla bad ka ri India.
Ha kane ka sngi, la pynlong ïa ka test bad ki drill bapher bapher ba kynthup naduh ka Vertical Jump, 10 Meter Ladder Run, 20 meter sprint bad Compass drill bad ïa baroh kitei ki Drill la thew la woh da ki kor Technology katkum ki juk stad mynta.
Ka MSOA ka dap da ka jinglyngngoh ba lai ngut ki heprit bad samla lud kila mih ban pyni ia ka sap jong ki ban pyndep ia ka jingiakop mareh bad iakop jump kat ka kyrdan International Level.
U Roney Lyngdoh u ba dang 11 snem rta ula mareh 2.71 sekon ha ka 10 meter Ladder Run, ka Badahunlang Syngkli 18 snem rta ha ka 50 Cms Vertical Jump bad u Kitboklang Shangpliang u la pyndep tang hapoh 2.37 secs ha ka Ladder run.
Ha kane ka sngi, la wan ban sakhi ïa kane ka rynsan da u Bah John F Kharshiing, Working President ka MSOA, u Bah Bobby L Nongbet District Sports Officer Nongpoh, Ian Bernard Campbell u player ba la shongthait ba na ka ri Australia, ki Official Jong ka Edge 10 group, ki Offical na ka tnad Sports Office, ki Nonghikai Skul, ki khynnah Skul bad ki Club bapher bapher jong ka thain Ri Bhoi.
