Shillong, Nailur 27 : Kawei ka Longkmie na Ri-Bhoi, kala lap da ki bitor pait hapoh ka dawai um bala ai napoh ka Nongpoh Civil Hospital ban pyndih ia I Khun ba dang hynriew snem ka rta.
Kat kum ka jingthoh dawai, kane ka dawai um ka kyrteng ka Acklogal-P bad la ai sha ine I Khynnah namar ka jingmynsaw ka kti ba khei khang da ka jingkhang myn ha ka 25 tarik Nailur.
Ki Dkhot ka Khasi Students Union (KSU) Nongpoh Circle, haba ioh jingtip ia kane ka jingjia, kala leit ban tuklar mar mar bad kala iakynduh ruh ia ka District Medical Health Officer (DMHO) ban dawa tohkit mar mar bad ban khang syndon ruh ia ka jingdie ia kane ka dawai hapoh ka District bad ka Jylla.
U General Secretary ka KSU Nongpoh samla Baiashanlang Kharshanlor ula pynpaw ia ka jingsngew khia halor ka jingshngain jong ki nongpang haba kum kine ki dawai ki don khamtam ha ki jaka sumar ka Sorkar.
Ula ong ba haba shem ia kum kine ki jaitkam, dei ban pyntip mar mar sha ki bor khmih ba kin leh ia kaba donkam.
Une u Nongialam ka KSU ula ong ruh baka Sorkar ka dei ban da phikir bha haba thied ia ki dawai kiba ju phah sha ki jaka sumar ka Sorkar bad ban da bishar bha ruh ia ki nongsupply kiba lah ban ai da ki dawai ki bym shngain.
Ka DMHO Dr TS Momin ka pyntip ba ia ki nongmuna jong kane ka dawai la phah mynta ban leh test da u Drug Inspector haba pyntip ruh ba ka Ophis kala bthah ban khang shipor ia ka jingpyniaid iew ia kane ka dawai hapoh ka District.
