Lap ka CAG ba siew be-ain ka KHADC haduh T.10.80 klur sha ki arngut ki Contrator

Shillong, K’lyngkot 12 : Ka Comptroller & Auditor General (CAG) kala lap ba ka Khasi Hills Autonomous District Council (KHADC) la kynnoh ba kala siew be-ain (irregular payment) ia ka jingsiew lypa (advance) ba kot haduh T.10.80 klur sha ki arngut ki Contractor.

Ka Audit kala shem ba ia kane ka jingsiew la leh hapdeng u Naitung 2018 bad Naiwieng 2019 sha ki arngut ki contractor-K Warbah (Sl No 1 Contractor) na ka bynta ka jingtei ia ka Building ka Ophis ka KHADC ha Shillong ba T.500 lak bad ia ka M/s Rodeka Enterprise (SL No 2 Contractor) ban tei ia ka Traditional Cultural Centre ha Umiam, Jingkieng Kalong ba T.580 lak.

“La iohi ba u Contractor (K Warbah) ula ioh ia ka jingsiew lypa (advance) ba kot haduh T. 5 klur (67%) na ka work order kaba kot T.750 klur. Ia u contractor (M/s Rodeka Enterprise) la siew T.5.80 klur (77%) na ka work order ba T.7.50 klur ha ki hynriew tylli ki installment” kala ong.

Ka Audit ka shem ba ka jingsiew lypa ia kine ki arngut ki contractor ka dei kaba la leh khlem da aiti ia ka bank guarantee bond.

“Nalor kata, ym shim la shem ruh ban don ka aplikeshon da ka jingthoh na ki contractor ba pan ia ka jingsiew lypa” ong ka CAG. Kala ong ruh ba ka jingpynbeit ia kane ka jingsiew lypa la leh ruh khlem da khein ia ka sut ba dei ioh kaba kot haduh T.1.98 klur.

“Namar kata, ka KHADC ym tang ba kala leh bakla ha kaba ai ia kane ka jingsiew lypa khlem ka jingkyrpad da ka jingthoh na ki contractor bad iateh ia ka bank gurantee bond hynrei kala bakla ruh ha ka jingduh ei ia ka sut kaba kot T.1.98 klur, kaba lam sha ka jingai jingmyntoi sha ki contractor haduh utei u pud” kala ong.

U Superintendent Engineer ka KHADC ha ka jubab ha u Risaw 2023, haba pdiang ia ka jingshem jong ka Audit, ula pynpaw ba ia kum kine ki rukom siew yn sa kiar noh hadien habud bad tang 15% ka jingsiew lypa (advance) la kynthup ha ka tender agreement ba thymmai kaba la dep mynjur da ka EC.