Shillong, Naiwieng 23 : U MDC ka 12 Barato Mukroh Constituency bah Aiborlang Shadap u dei uwei napdeng kiba bun ki riew paidbah kiba lait im na ka jingther kuli jong ki Pulit Assam hynnin ka step sngi Ba-ar ha Mukroh, West Jaintia Hills.
Haduh 5 ngut ki riew paidbah na shnong Mukroh kila kyllon iap ha ki kuli ki Pulit Assam lem bad uwei u Forest Guard ka Assam.
Une u MDC ula ioh pdiang ia ka phone ha ka por 5 baje mynstep na u Rangbah Shnong ba pyntip halor ka jingwan rung ka kali ki Pulit Assam sha u pud u sam ka Meghalaya ryngkat ki suloi.
“Ha ka por ba nga mut leit sha katei ka jaka, nga la phone ia u SP bad kylli balei ba ki Pulit Assam ki wan rung bad ban leh aiu” ong u Bah Shadap.
U pyntip ba ula pyrshang ruh ban kyrpad ia u Forest Range Officer ka Assam ba un pyrshang pynsngewthuh ia ki Pulit Assam ban nym mih kano kano ka huri hura. “Ka dei ha ka por ba dang iakren kaba la iaid kumba 2 kynta eiei, nga la iohi ba ka jingiakren kala nang khluit bad ki paidbah ruh kim kwah sngap bad dei namar ha kane ka por ba kala mih ka jingther kuli” ula iathuh.
Une u MLA ula phet sha khlaw bad rieh hapoh khlaw. Ula hap ban rieh tad haduh ba ka jinglong jingman kala kham jai jai. Ula la iathuh ruh ba wat hapdeng ka jingpyrshang ban phone bunsien sha ki bor District hynrei kala shimpor haduh 3 kynta ia ki ba kin wan lem bad ki Pulit.
Nalor u Bah Shadap kila don bun ki nongshongshnong bad ki kynhun Sengbhalang kiba dawa ban buh noh ia ka Police Outpost ban ai jingiada ia ki paidbah ba sah ha ki jaka khappud.
