Nongpoh, Iaiong 10 : Ka MDC ka NPP na Umsning Constituency, Kong Magdalene S Mawlong, kala shu lait da ka said na ki jingma bad jingmynsaw hynne ka janmiet sngi Balang, na ka jingwan hiar thma kynsan ka kynhun ki runar kiba la lum maw ia ka Iingsah jong ka, kaba don ha Mawlein Mawkhan (Sohkyndur) ba ju tip kum ka Ladsharai.
Kane ka jingjia kala jia ha ka por 6 baje eiei katba kane ka MDC ka dang ieng kren phone ha phyllaw iing ha ka jingpynkreh ban leit sha ka jingialang ialap elekshon Lok Sabha na ka bynta ka kyrtong ka NPP Kong Ampareen Lyngdoh.
La iathuh ba katba kane ka MDC ka dang kren phone, kynsan kynsan la wan her ki maw najan jong ka bad kine ki maw kila leit shei ia ki jingkhang iit jong ka kamra kaba kane ka MDC ka shait shong ban iakynduh ia ki paidbah.
Ki Pulit ka Umiam Police Station haba ioh jingtip ia kane, kila hiar mar mar sha ka Iingsah jong kane ka MDC ban pynlong ia ka jingtohkit kaba bniah.
Ki Pulit kila lum sakhi halor kane ka jingjia ban pynlong ia ka jingbuddien ban lap ia ki briew kiba donkti ban leit kawang maw ia ka Iingsah jong ka kong Magdalene.
Na ka lang ka NPP, Umsning Constituency kala pynrem jur ia kane ka jingjia bad kila kyrpad ruh ia ki bor ka Ain ba kin pynlong ia ka jingtohkit kaba thikna ban lap ia ki briew kiba donkti.
Lah ban kdew hangne, kane ka jingjia kala jia tang arsngi hadien ka jingkulmar kaba mih ha ka jingialang ialap elekshon ka NPP ha Umsning.
Kane ka jingkulmar kala mih na ka jingleit pynthut jong ki nongkyrshan ka VPP ia ka jingialang.
