Nongpoh, Jylliew 05 : Lai ngut ki Nong Mawlang kila lait phet salit na ka kti jong ki kynhun nongrahbor hadien ka jingshah rahbor ba shisngi ha Assam. Kane ka jingjia kala jia ha ka ka janmiet sngi Ba-ar katba ki dang thmu ban leit thied ia ka kor puh shilum na Nongbah Guwahati, Assam.
Kine ki laingut ki kyrteng u Bah Iohborlang Kharsati, u Kostarwell Jyrwa kiba dei na Mawlang bad u Samsul Ali. Kine ki briew kila shah rahbor ha ka por 7 shiteng baje janmiet na ka thain Assam.
Ia kane ka jingjia la wan pyntip sha ki Pulit ka Ri-Bhoi District, da ka kurim u Bah Iohborlang Kharsati ka kong Kirit Dohtdong kaba iathuh ba kine ki nongrahbor kila dawa pisa haduh T. 7 lak ban pyllait im ia kine ki briew ba shah rahbor.
Ki Pulit ka Ri-Bhoi ki iathuh ba ka kong Kirit kala ioh ia ka phone call na u nombor phone jong u kurim, kaba la kren da kine ki nongrahbor.
Ki Pulit ka Ri-Bhoi kila pynlong mar mar ia ka jingtohkit bad ha ka sngi kaba bud (5 tarik), kila iohksai ba kine ki briew ba shah rahbor ki don ha ka thain Nalbari, Assam. Ka kynhun ki Pulit kala hiar mar mar sha kane ka jaka bad kala pan ia ka jingiatreilang na ki Pulit ka Nalbari ban pynlong ia ka jingthwet ia kine ki nongrahbor.
Ki Heh Pulit ki iathuh ba dei ha ka por 3 baje janmiet, kila ioh khubor na ki Pulit ka Mukulmua Police Station ba kila ioh ban kem ia arngut ki briew ba suba jur ba dei ki nongrahbor bad ioh kurup ruh ia ka Maruti Ignis bym pat don nombor. Kine ki arngut ki kyrteng u Samsul Hoque bad u Abdul Aziz kiba dei na ka shnong Kaplabori, Nalbari District, Assam.
Ki Heh Pulit ki iathuh ba kine ki arngut kila phla ia ka jingdonkti ban rahbor bad phla ruh ia ka kyrteng jong kiwei pat kiba iadonkti lang nalor ka jaka bala kit ia kine ki laingut kiba shah rahbor.
Mar kumta, ki Pulit ka Assam kila pyntip noh mar mar sha Tihu Police Station kiba la pynlong ia ka jingtalasi kali ha surok bah ha Tihu ban bat ia ka kali ba kit ia kine ki nong Meghalaya.
Ki heh Pulit ki iathuh ba dei katba ka jingtalasi ka dang iaid shakhmat, kane ka kali ba kit ia kiba shah rahbor kala poi iaid lynti na kane ka jaka bad dei ha ka por ba sangeh ia ka kali, kine ki briew ba shah rahbor kila kynthih napoh ka kali bad mareh shajan ki Pulit. La ong ba ki nongrahbor ruh kila phet bak noh na kane ka jaka.
Ki Pulit ka Tihu Police Station kila ialam noh ia kine ki 3 ngut kiba shah rahbor sha Thanad bad ka jingtohkit ban lapdien ia ki briew ba donkti ban rahbor ka dang iaid shakhmat.
