Nagaon, Nohprah 07 : Haduh kumba 16 ngut ki khynnah samla kiba la kyrni ha ki jingdih drok kila phet krad noh napoh ka jaka aijingsumar na Puranigudam hapoh Nagaon district ka Assam hynnin ka step sngi ba Ar.
Kine ki samla kila phetkrad noh na katei ka jaka aijingsumar da kaba pynpra ia ka grill jong ka kamra shet hapoh kane ka jaka sumar kaba kyrteng “Pure Life Foundation” hapoh Parghat, Puranigudam.
Ia kane ka jingjia jong ka jinglait phet la sakhi ruh lyngba ka CCTV camera ba la pyndait hapoh kane ka jaka aijingsumar, kata ka jingjia kaba la pynkyndit ruh ia ki marjan marjan kiba don ha kane ka jaka.
Kine ki samla kila ioh lad ban phet krad na kane ka jaka hadien ba u nongkhmih jong kane ka jaka u dang don ha ka lynti ban leit sha kawei ka dukan kaba don marjan.Kiba bun kiwei pat ki para samla kiba don ha kane ka jaka sumar la kynnoh ba kila shah byrthen bad kiwei pat kila phet krad noh na kane ka jaka.
Ha kaba iadei bad kane ka jingjia, na ka liang u director jong ka “Pure Life Foundation” ula ujor da ka FIR hapoh Puranigudam police station.
Ha kawei pat kaba kum kane ka jingjia kaba la jia hapoh ka jaka aijingsumar ha Old Amolapatti hapoh Golaghat district ka Assam ha ka 24 tarik u Naiwieng ba la dep, phra ngut ki samla kiba la kyrni ha ki jingdih drok bad kiba dang don hapdeng ka jingshah sumar ha kane ka jaka kila phet krad noh na ka jaka sumar.
Phra napdeng ki 25 ngut ki samla kila don ha kane ka jaka ba la tip kum ka ‘Blessing Care Foundationna’ na ka bynta ban ioh ia ki lad jingsumar kila phet krad noh hadien ba kila pynpra ia ka grill jong ka skylight ne ventilator.
Ha kane ka jingjia la ong ba u nongkhmih ia kane ka jaka sumar ula pyrshang ban pynsangeh ia ki, hynrei ula ngat pynban ha ka jingshah thombor.
Ia kine ki samla kiba la lait phet la tip kyrteng kum u Ankur Gogoi, Samiran Shaym, Vinod Thakur, Vikash Basfar, Partha Pegu, Champak Bora, Hemant Mech bad u Amrit Chetri.
